Ura në ngushticën e Mesinës ishte paraparë të ndërtohej shumë kohë më parë, mirëpo që atëherë pati plane të ndryshme, duke përfshirë një ide për një tunel, por këto ide mbetën “si uji nën urë”, transmeton InLajmi.
Nëse ndërtohet, ura përtej Ngushticës së Mesinës do të shtrihej 3.2 kilometra dhe do të ishte ura më e gjatë e varur në botë.
Tani projekti masiv inxhinierik mund të realizohet, falë një dekreti të miratuar nga qeveria e Giorgia Melonit.
Në vitin 2006, oferta për ndërtimin e urës iu dha një firme italiane Salini Impregilo, e quajtur tashmë WeBuild. Kur qeveria e Berlusconit ra atë vit, planet për të ndërtuar urën “u shembën” me qeverinë e tij pasi kryeministri i ardhshëm, Romano Prodi, e konsideroi atë si një humbje parash dhe një rrezik për mjedisin.
Që atëherë, qeveri të ndryshme janë përpjekur ta ringjallin atë dhe koalicioni aktual qeverisës nën Melonin, Salvinin dhe Berlusconin e futi atë në listën e premtimeve të fushatës së tyre. Kur Salvini u bë ministër i transportit, ai e bëri atë prioritetin e tij.
WeBuild, e cila ende ka çmimin e ofertës në letër, paditi qeverinë për shkelje të kontratës pasi projekti u ndalua, por ajo mbetet kompania më e mundshme që t’i kthehet puna pavarësisht “shprehjeve të interesit nga e gjithë bota, përfshirë Kinën. ”, i tha Salvini Shoqatës së Shtypit të Huaj në Romë në mars kur prezantoi planin.
“Ata që fituan tenderin e 2006 janë ata që me shumë gjasa do të vazhdojnë me versionin përfundimtar të projektit,” tha ai.
Drejtori inxhinierik i WeBuild, Michele Longo, u ftua në parlament për të folur për planin e riprojektuar më 18 prill.
“Ura mbi ngushticën e Mesinës është një projekt që mund të fillojë të jetësohet menjëherë. Sapo kontrata të rivendoset dhe përditësohet, projekti mund të fillojë,” tha Longo në parlament. “Projektimi ekzekutiv pritet të zgjasë 8 muaj, ndërsa koha e nevojshme për ndërtimin e urës do të jetë pak më shumë se 6 vjet.”
Kostoja e projektit është 4.5 miliardë euro vetëm për urën dhe 6.75 miliardë euro për infrastrukturën për ta mbështetur atë nga të dyja anët. /InLajmi/
