Në kuadër të 1 Majit, Ditës Ndëkombëtare të Punës, deputeti i Lidhjes Demokratike të Kosovës Avdullah Hoti, paraqiti 4 vërejtjet e tij drejtuar Qeverisë së Kosovës për Ligjin e Pagave, përcjell InLajmi.
Sipas Hotit, pagat nuk u rritën, ani pse inflacioni më i lartë në 15 vitet e fundit e goditi vendin.
Hoti thekson se Ligji i pagave në sektorin publik më shumë krijoi probleme se që zgjidhi, duke shtuar se krijoi pasiguri pasi uli ndjeshëm pagat në veçanti në institucionet e pavarura dhe për profesionet e rralla në treg.
Për më tepër, ai thotë se Ligji për Pagën minimale është harruar plotësisht nga Qeveria e Kosovës ndërsa përmend edhe dyfishimin e tatimit në pronë dhe shtrenjtimin e energjisë elektrike.
Postimi i plotë i tij:
4 vërejtje për ditën e 1 majit:
- Pagat nuk u rritën në vitin me inflacionin më të lartë në 15 vitet e fundit, përkundrazi. Bazuar në raportin e buxhetit për 2022, shpenzimet totale për paga të 85 mijë punëtorëve të sektorit publik (që janë 1/4 e punëtorëve në nivel vendi) pësuan rënie me 3% krahasuar me vitin paraprak.
- Ligji i pagave në sektorin publik më shumë krijoi probleme se që zgjidhi. Ky ligj krijoi pasiguri pasi uli ndjeshëm pagat në veçanti në institucionet e pavarura dhe për profesionet e rralla në treg (ekspertët e teknologjisë së informacionit, inxhinierët e ndryshëm etj.). Për shkak që është shtyer miratimi i tij pa asnjë arsye, ishte vonë për tu buxhetuar në mënyrë të rregullt në buxhetin e vitit 2023. Për shkak të mungesës së konsultimeve me sindikatat, shumë të punësuar mbetën të pakënaqur dhe ligji përfundoi në Gjykatë Kushtetuese.
- Ligji për pagën minimale, që do të ndikonte në rritjen e pagave të ulëta në sektorin privat, u miratua në lexim të parë në Kuvend para një viti. Nga atëherë është harruar plotësisht, edhe pse ky ligj përbënte ‘reformën’ kryesore të mazhorancës së majtë në pushtet.
- Në anën tjetër, pa asnjë konsideratë për gjendjen ekonomike, (i) u dyfishua tatimi në pronë për shumë qytetarë dhe biznese, si dhe (ii) dy herë u shtrenjtua energjia elektrike. Pavarësisht se me subvencione po ndihmohen familjet që kursejnë energji, si dhe janë ndihmuar bizneset gjatë vitit 2022, në fund të fundit efekti makroekonomik është i njëjtë pasi po përdoren tatimet e qytetarëve për këto subvencione. Këto tatime do të mund të shkonin për të mira të tjera publike shumë më të nevojshme, siç është arsimi dhe shëndetësia. /InLajmi/