Kardiologu Gani Bajraktari ka thënë se mjekët nga Kosova nuk po ikin për para, por më shumë dinjitet. Ai thotë se në Kosovë mjekët nuk i mbron shteti, derisa në perëndim mbrohen dhe janë më të sigurt.
“Ikja e mjekëve është trend evropian. Por në Kosovë a mungesë të kushteve të punës. Institucionet kanë qasje jokorrekte në drejtim të mjekëve. Pagat e mjekëve kanë qenë skandaloze, tash janë relativisht të kënaqshme por jo të mira. Në vendet e rajonit mjekeve ua japin hakun për punën e tyre”, ka deklaruar Bajraktari.
Ai thotë se mjekët në Kosovë bartin përgjegjësi të madhe derisa sipas tij nuk respektohen sa duhet për këtë punë.
“Vetëm mbrëmë unë kam qenë kujdestar në QKUK dhe kam stentuar pesë pacientë me infarkt akut dhe në momentin që i kam lënë kanë gëzuar shëndet të mirë. Pra pesë pacientë brenda natës, është punë me përgjegjësi jashtëzakonisht të lartë”.
Duke folur për situatën e shëndetësisë në Kosovë, Bajraktari që është edhe profesor universitar thotë se buxheti në këtë sektor është shumë i rëndësishëm, por jo më i rëndësishmi.
“Faktori material [buxheti] në shëndetësi zë vendin e 3 apo 4. Problemi kryesor është menaxhimi dhe vendimet e mëdha. Arben Vitia është njeri i mirë dhe ndershëm, por nuk e di nëse do të jetë në gjendje të marrë vendime të mëdha”.
Bajraktari thotë se me përshkrimin e punës ministri i Shëndetësisë duhet të merret vetëm me menaxhimin e situatës, por sipas tij për të pasur rezultate ai duhet t’i tejkalojë kompetencat, shkruan RTV Dukagjini.
“Ministri duhet të zbresë vetë më QKUK dhe të qëndrojnë një ditë në ndonjë klinikë dhe të presë vet problemin me gërshërë”, ka deklaruar tutje Bajraktari.
