Me moton “Zërë Hapin Vaksina Shpëton Jetë” përfundon java e imunizimit e cila po realizohet në të gjitha Qendrat e Vaksinimit në Kosovë.
Kështu kanë bërë me dije zyrtarë nga IKSHP-ja. Ndërsa stafi shëndetësor i imunizimit thonë se me qëllim të pjesëmarrjes sa më të madhe, po i kontaktojnë prindërit edhe përmes telefonit që t’i sjellin fëmijët e tyre për vaksinim.
Sot në Kosovë përfundon Java e Imunizimit e cila i bën bashkë të gjitha institucionet shëndetësore për të promovuar dhënien e vaksinave për t’i mbrojtur personat e të gjitha moshave nga sëmundjet e ndryshme.
Bendise Gashi nga Fushë Kosova, thotë se ishte lajmëruar që të paraqitej për vaksinimi e djalit të saj 20 muajsh në Qendrën e Vaksinimit.
“Kam ardhur për vaksinim, zakonisht i kam marr vaksinat e rregullta e vetëm vaksinën e një vjeçe ia kam vonuar pak, sepse e kam pasur djalin me grip. Me thirren nga Qendra e Vaksinimit në telefon ma kanë bërë terminin për sot. Ia bëra një kontroll dhe po pres ta vaksinojë”, deklaroi ajo.
Sipas statistikave të Ministrisë së Shëndetësisë, Kosova ka një përqindje shumë të lartë të fëmijëve të vaksinuar.
Përqindja e fëmijëve që kanë marrë tri doza të vaksinës kundër difterisë, tetanozit dhe kollës së mirë, në vitin 2019 ishte 97%, në vitin 2021 ajo kishte rënë një 87% për shkak të Covid -19, por ishte ngritur sërish me 5% në vitin 2022.
Një gjë të tillë e konfirmon edhe Fetije Fetaj, shefe e vaksinimit në Institutin Kombëtar të Shëndetësisë Publike në Kosovë ajo thotë se ka thënë se në Kosovë ka një mobilizim të mirë të prindërve që t’i vaksinojnë fëmijët.
“Në të gjitha Komunat e Kosovës është duke u mbajtur java e Imunizimit. Kemi një përgjigje shumë të mirë të prindërve, por edhe të rriturve për vaksinim. Faktikisht 2 viteve të fundit kishim një ulje të mbulueshmërisë me vaksina, por këtë vit mendojmë shumë mirë dhe mund te themi lirisht se është mbi 90% mbulueshmëria në bazë të kalendarit të rregullt të vaksinimit”, deklaroi ajo, shkruan RTK
Programi i obligueshëm për imunizim për herë të parë filloi në vitin 1948 me vaksinën kundër tuberkulozit dhe vazhdoi me vaksinën kundër difterisë, tetanus dhe kështu me radhë, përfshirë edhe vaksinimin kundër COVID-19.
