Drejtori i Zyrës së Qeverisë së Serbisë për Kosovë, Petar Petkoviq, ka reaguar ndaj kërkesës së kryeministrit Albin Kurti që Kuvendi i Komunës së Mitrovicës së Veriut të diskutojë dhe të marrë vendim për hapjen e urës mbi lumin Ibër, e cila ndan pjesën veriore dhe jugore të qytetit, transmeton InLajmi.
Tutje Petkoviq ka deklaruar se me këtë kërkesë kryeministri Kurti pa mëdyshje tregon se “dëshiron dhe ëndërron luftë” duke sjellë konflikt në pjesën veriore.
Petkoviq përmes një komunikate me shkrim ka thënë se Kurti sot ka urdhëruar këshilltaren e tij Aida Doli që në seancën e Kuvendit Komunal të përfshijë në diskutim pikën e rendit të ditës për hapjen e urës mbi lumin Ibër, e cila ndan pjesën veriore dhe jugore të qytetit që është një mur mbrojtës i rëndësishëm për sigurinë e serbëve në atë pjesë të Kosovës.
“Qëllimi i kësaj lëvizjeje të njëanshme dhe të paligjshme të Kurtit është që të çojë në tensione dhe provokime të reja në kurriz të popullit paqësor serb në veri të Kosovës”, tha Petkoviq, duke shtuar se Kurti po përdor përfaqësuesit e tij jolegjitimë dhe të rremë dhe këshilltarët në veri të Kosovës për këtë.
Sipas tij, hapja e urës në Ibër është pjesë e dialogut mes Beogradit dhe Prishtinës, e jo “gauleiter ilegal i Kurtit”.
Petkoviq deklaroi se për këtë ai ka njoftuar menjëherë të gjithë përfaqësuesit ndërkombëtarë, si dhe ndërmjetësuesin në dialog, Miroslav Lajçak, dhe se Beogradi pret që ata “të qetësohen dhe të frenojnë Kurtin, i cili po bën gjithçka për të shpëtuar nga detyrimi për formimin e Asociacionit dhe të dështojë dialogun në Bruksel më 2 maj”, shkruan Danas.
“Nuk ka përparim apo normalizim të marrëdhënieve përderisa Kurti bën lëvizje të tilla të njëanshme me të cilat dëshiron ta sjellë në gjendje lufte në tërë veriun e Kosovës dhe i takon perëndimit të parandalojë lëvizje të tilla të Prishtinës. “, ka vlerësuar Petkoviq. /InLajmi/
