Parlamenti Evropian miratoi progres raportin e saj edhe për Serbinë, shtet i cili rezultoi me problematika tepër të mëdha.
Normalizimi i marrëdhënieve me Kosovën dhe vendosja e sanksioneve ndaj Rusisë për të dënuar luftën e nisur në Ukrainë, ishin mes kushteve kryesore për Serbinë që të avancojë në anëtarësimin në Bashkimin Evropian.
Në raport, qeveria e Beogradit kritikohet ashpër edhe për përkeqësimin e lirisë së medias dhe sundimit të ligjit.
Raportuesi për Serbinë në Parlamentin Evropian, Vladimir Bilçik, njoftoi se institucioni evropian do ta monitorojë me kujdes zbatimin e marrëveshjes së Ohrit, transmeton A2CNN.
Në raportin për Serbinë, parlamenti i jep mbështetje të plotë dialogut dhe ndërmjetësit europian Miroslav Lajçak dhe u bën thirrje të 2-ja palëve të arrijnë një marrëveshje ligjërisht të detyrueshme të bazuar në parimin e njohjes reciproke.
