Mos respektimi i rregullave të komunikacionit vazhdon të jetë sfidë e vazhdueshme për autoritetet e sigurisë, ndërsa pavarësisht ndëshkimeve për shkeljen e rregullave në komunikacion, shoferët në Kosovë vazhdojnë me “avazin” e tyre duke tejkaluar rregullat por në shumë raste edhe rekomandimet e shpejtësisë që pasojë kanë aksidentet të cilat në shumë raste përfundojnë me fatalitet, përcjell InLajmi.
Por është Policia e Kosovës, ajo që nuk dorëzohet përballë sfidës me vozittjet e pakontrolluara nga shoferët, të cilët zhvillojnë aktivitete vetëdijsuesenë, por edhe kanë shtuar kontrollet në trafik,pa anashkaluar edhe ndëshkimet për shoferët e papërgjegjshëm.
Megjithë angazhimin e organeve të sigurisë në komunikacion dhe masat ndësjkuese që i aplikon, këto të fundit duket se nuk po respektohen edhe aq, por policia është ajo që nuk po “lëshon pe”, pasi shqipton masat të rrepta për shoferët e “lazdruar” në komunikacion.
Masat janë të shumta e për ata që bëjnë shkelje më të mëdha të rregullave ndëshkimet janë edhe më të rënda, e ajo që vërtet mendohet të jetë më e “ashpër” është konfiskimi i patentë shoferit për një kohë të caktuar, përveç gjobave me të holla.
Por këto masa si duket nuk po mjaftojnë, derisa numri i atyre që i’u është ndaluar drejtimi i mjetit me veprim motorik për kundërvajtje të ndryshme në trafik është në rritje 3 mujorin e parë të këtij viti.
Se ka rritje të këtyre rasteve e dëshmojnë më së miri statistikat e Policisë së Kosovës dërguar Gazetës InLajmi, të cilat konfirmojnë se brenda 3 mujorit të parë të këtij viti 1971 shoferëve iu është ndaluar drejtimi i mjetit.
“Statistikat tregojnë se gjatë periudhës kohore Janar-Mars 2023, gjithsejtë 1971 shoferëve iu është ndaluar drejtimi i mjetit me veprim motorik për kundërvajtje të ndryshme në trafik”, u deklaruan zyrtarët policorë për Gazetën InLajmi.
Mirëpo përkundër masave të ashpra të ndërmarra nga Policia, nuk është se ka rënie të numrit të aksidenteve në komunikacion meqë statistikat flasin për shtimin e aksidenteve muajt e fundit si pasojë e mos-respektimit të rekomandimeve për lëvizje në komunikacion.
Nga Policia e Kosovës tutje u bë e ditur se gjatë periudhës Janar-Mars të këtij viti në tërë territorin e Kosovës kanë ndodhur mijëra aksidente.
“Në periudhën janar- mars të këtij viti janë shënuar 4,248 aksidente, e numri i aksidenteve me lëndime është në rritje për 1.01% apo 16 raste më shumë se në periudhën e njëjtë të vitit të kaluar”, u deklaruan nga Policia e Kosovës.
Ndryshe Policia e Kosovës vazhdimisht u ka bërë thirrje të gjithë drejtueseve të automjeteve, të mos ecin me shpejtësi tej normave të lejuara, të mos bëjnë manovrime të gabuara në rrugë, të mos drejtojnë mjetin nën ndikimin e alkoolit apo në gjendje të dehur. Libona Gegaj /InLajmi/
