Ministër i Ministrisë për Administrimin e Pushtetit Lokal në Republikën e Kosovës, Elbert Krasniqi, ka ftuar në takim ekipin menaxhues për hartimin e statutit të Asociacionit të Komunave me Shumicë Serbe, përcjell InLajmi.
Ky ekip menaxhues nuk i ka kthyer përgjigje Krasniqit.
Krasniqi bëri të ditur se Danijela Vujiçiq është anëtarja më e re e këtij ekipi, sipas vendimit të vitit 2020. Njëherësh, ajo është emëruar edhe si koordinatore e Ekipit Menaxhues.
Pika e 6 e vendimi të vitit 2020 parasheh që Ekipi Menaxhues koordinohet dhe i raporton për aktivitetet e tij ministrit të Administrimit të Pushtetit Lokal.
Postimi i plotë i tij:
Së fundmi, si ministri kemi marrë shumë pyetje dhe kërkesa për qasje në dokumente publik për vendimin për “Ekipin Menaxhues për hartimin e Statutit të Asociacionit të Komunave me Shumicë Serbe”.
Më lejoni që të ju njoftoj se për këtë ekip, janë gjithsej 3 vendime të Ministrisë së Pushtetit Lokal të 3 qeverive të ndryshme, që janë bazuar në Marrëveshjen e Brukselit të vitit 2013.
Vendimi i parë ishte marrë në qershor të vitit 2013, gjatë Qeverisë Thaçi.
Vendimi i 2-të ishte marrë në qershor të vitit 2016, gjatë Qeverisë Mustafa.
Vendimi i 3-të ishte marrë në shtator të vitit 2020, gjatë Qeverisë Hoti.
Nga përbërja fillestare vetëm 2 anëtarë kanë mbetur të pandryshuar; Igor Kalamar dhe Dejan Radojkoviq. 2 tjerë janë ndryshuar vazhdimisht. Danijela Vujiçiq është anëtarja më e re e këtij ekipi, sipas vendimit të vitit 2020. Njëherësh, ajo është emëruar edhe si koordinatore e Ekipit Menaxhues.
Pika e 6 e vendimi të vitit 2020 parasheh që Ekipi Menaxhues koordinohet dhe i raporton për aktivitetet e tij ministrit të Administrimit të Pushtetit Lokal.
Ju njoftoj se të martën me 18 prill, si ministër unë i jam drejtuar me ftesë për takim këtij grupi. Ftesë kjo që nuk ka marrë përgjigje. /InLajmi/
