Kryetari i Kuvendit të Kosovës, Glauk Konjufca, bëri homazhe te përmendorja dedikuar personave të zhdukur me dhunë gjatë luftës, raporton InLajmi.
Konjuca theksoi se janë mbi 1.600 të zhdukur me dhunë ndërsa shtoi se Serbia po e mban të fshehtë vendin se ku ndodhen trupat e tyre.
“Sot po i përkujtojmë të gjithë të zhdukurit me dhunë nga Serbia. Njëri prej krimeve, gjenocidit të Serbisë ishte rrëmbimi dhe zhduka me dhunë e shumë personave. Edhe sot e kësaj dite mbi 1600 mbeten të pagjetur, jo pse nuk e dimë ku janë e dimë edhe përgjegjësi, por është shteti i Serbisë që po e mban të fshehtë këtë gjë”, tha Konjufca.
Kryetari i Kuvendit theksoi se institucioneve u mbetet të ngritin zërin, në mënyrë që fati i të pagjeturëve të zbardhet dhe Serbia të japë përgjegjësi.
“Neve na mbetet jo vetëm t’i kujtojmë por edhe ta ngrisim zëri që fati i tyre të zbardhjet e Serbia të japë llogari e përgjegjësi. Lavdi të gjithë martirëve dhe të zhdukurve me dhunë, Lavdi dëshmorëve që e dhanë jetën për liri”, tha Konjufca. /InLajmi/
