Presidenti serb Aleksandar Vuçiq deklaroi të martën se Serbia do të respektojë reciprokisht integritetin territorial të vendeve që respektojnë integritetin e Serbisë, transmeton InLajmi.
Ky reagim i presidentit serb vjen ndaj vendeve të cilat votuan por edhe abstenuan pë aplikimin e Kosovës për anëtarësim në Këshillin e Evropës.
“Në politikën tonë të jashtme do të kujdesemi që marrëdhëniet dypalëshe të mos dalin përtej kufijve të reciprocitetit, nëse dikush nuk respekton integritetin territorial të Serbisë, pse duhet të jemi të detyruar ta respektojmë të tyren? Këto nuk do të jenë ndryshime të parëndësishme në politikën tonë, jotektonike, por të thella dhe thelbësore”, tha Vuçiq para gazetarëve në Beograd.
Ndërsa foli për votimin e kërkesës së Kosovës për pranim në Këshillin e Evropës, Vuçiq tha se rezultati ishte i pritshëm.
“Ne e dinim se ata kishin një shumicë”, tha ai, duke shtuar se e vetmja gjë e papritur ishte vendimi i Hungarisë për të votuar kundër.
Ai shtoi se shumica e atyre që votuan pranimin e kërkesës së Kosovës për anëtarësim në Këshillin e Evropës janë anëtarë dhe kandidatë për integrim në Bashkimin Evropian, janë vende që “dëgjojnë pa diskutim Brukselin dhe Uashingtonin për të gjitha çështjet dhe orientimi i politikës së jashtme të të cilëve është të jenë “të bindur”.
“Ne nuk duhet të lejojmë veten të na presin një dorë apo këmbë e pastaj të ndërpresim marrëdhëniet me të gjithë në botë, por ajo që duhet të ndryshojmë në sjelljen tonë është të respektojmë ata që janë miqësorë ndaj nesh më shumë sesa kemi bërë deri më tani. Duhet ta dijmë dhe kujtojmë gjithmonë se Spanja, Hungaria, Qiproja, Rumania, Azerbajxhani dhe Gjeorgjia janë përpara gjithë të tjerëve”, tha president i Serbisë.
Ndrërsa shpreh mirënjohje për vendet që votuan kundër, Vuçiq shprehu zhgënjimin e tij me votën e Ukrainës, Bosnjë-Hercegovinës dhe Armenisë.
Gjithashtu Vuçiq, sikur ndjehet i “lënduar” nga veprimi i Malit të Zi, ndërsa bëri të ditur se ky veprim do të ketë ndikim në marrdhëniet mes 2 vendeve.
Komiteti i Ministrave të Këshillit të Evropës vendosi dje në një seancë të jashtëzakonshme që kërkesën e Kosovës për pranim në atë organizatë panevropiane t’ia përcjellë Asamblesë Parlamentare për konsultim, shkruan Danas.
Në vendimin e publikuar në faqen e Këshillit të Evropës, Komiteti i Ministrave i referohet Marrëveshjes për rrugën e normalizimit të marrëdhënieve ndërmjet Kosovës dhe Serbisë nga 27 shkurti dhe aneksit të zbatimit të saj nga 18 marsi, në të cilën liderët e të 2-ja palët arritën një marrëveshje në dialog me ndërmjetësimin e BE-së. /InLajmi/
