Presidenti i Republikës Sërpska në Bosnjë e Hercegovinë, Milorad Dodik, përsëriti sot se nuk beson në shtetin e BeH-së dhe se e vetmja zgjidhje racionale është ndarja e këtij shteti.
“Unë nuk besoj në Bosnjë dhe Hercegovinë, është një vend i mbyllur, nuk ka pasur kurrë një shans për të pasur sukses, Bosnja dhe Hercegovina nuk ka pasur perspektivë edhe kur u krijua në Dejton, dhe e vetmja gjë racionale është ta ndajmë atë”, tha Dodik për Radiotelevizionin e Serbisë (RTS).
Sipas fjalëve të tij, përfaqësuesit boshnjakë ranë dakord të nënshkruajnë Marrëveshjen e Dejtonit, sepse fuqitë e mëdha u premtuan atyre se një ditë do të kishte centralizim të plotë të BeH-së.
Duke folur për deklaratën e tij të fundit se po avokon për bashkimin e Republikës Sërpska me Serbinë, ai deklaroi se nuk e sheh problem në “të qenit një Serbi e madhe” dhe se jeton me idenë dhe shpresën që një ditë në të ardhmen RS-ja dhe Serbia do të jenë të bashkuar.
Ai shtoi se kjo është “aspirata historike” e popullit serb në RS.
Duke deklaruar se RS kujdeset për paqen, ai tha se populli serb nga RS nuk do të pajtohet kurrë me një BeH të tillë dhe se përfaqësuesit boshnjakë po kërcënojnë me luftë nëse RS bëhet e pavarur.
“RS do të jetë një shtet i pavarur dhe këtë do ta arrijë në paqe. Ne nuk kemi plan lufte, një ditë do ta marrim atë vendim në parlament dhe do ta shpallim RS-në shtet të pavarur. Si do ta pengoni me armë këtë vendim të parlamentit”, tha Dodiku.
Ai shtoi se “ai ka disa aleatë” për këtë, ndërsa tha se disa “do të duhet” të mbështesin pavarësinë e RS.
Dodiku hodhi një sërë akuzash ndaj Gjykatës Kushtetuese të Bosnjë-Hercegovinës, duke njoftuar se Asambleja Kombëtare e RS-së nesër do të miratojë një vendim për tërheqjen e gjyqtarëve serbë nga ai institucion gjyqësor.
Sipas fjalëve të tij, tani çështja kryesore politike është çështja e pronës shtetërore, me të cilën Republika Sërpska dëshiron të shembet, shkruan N1.
Presidenti i RS tha më tej se Bosnja dhe Hercegovina nuk e ka njohur Kosovën, se për çështjen e Kosovës “e ndjek Beogradin”, ndërsa tha se boshnjakët do ta njihnin pavarësinë e Kosovës, duke shmangur përgjigjen e drejtpërdrejtë në pyetjen pse Bosnja dhe Hercegovina dje abstenoi nga votimi për anëtarësimin e Kosovës në Këshillin e Evropës.
Në Këshillin e Evropës dje, zëvendësambasadorja e BeH-së në Strasburg, Tanja Milashinoviq, e cila është anëtare e stafit nga RS, abstenoi nga votimi, transmeton Klan Kosova.
“Ata nga Sarajeva do ta copëtonin Serbinë dhe çdo ditë i kërkojnë (presidentit serb Aleksandar) Vuçiq të sulmojë Dodikun. Problemi i tyre është Serbia e fortë”, tha Dodiku.
