Aplikimi i Kosovës është pranuar në Këshillin e Evropës, më konkretisht faza e parë e këtij procesi është kaluar me sukses, përcjell InLajmi.
Lajmin e ka bërë të ditur zëvendësministri i Punëve të Jashtme të Kosovës, Kreshnik Ahmeti.
Komiteti i Ministrave, me mbi 2/3 e votave të nevojshme, votoi në favor të pranimit të aplikimit të Republikës së Kosovës në KE dhe kërkoi opinionin e Asamblesë Parlamentare mbi këtë aplikim.
Ahmeti e cilësoi pranimin e aplikimit në KE si një sukses të rëndësishëm multilateral të Republikës së Kosovës.
Zëvendësministri theksoi se Kosovën e pret një punë intensive në APKiE, organ i cili do të përpilojë një numër raportesh mbi Kosovën dhe do ta jap opinionin e tij mbi anëtarësimin e saj në KE.
Postimi i plotë i tij:
Aplikimi i Republikës së Kosovës pranohet në Këshillin e Evropës (KE) – faza e parë e procesit kalohet me sukses
Para pak minutash, Komiteti i Ministrave, me mbi 2/3 e votave të nevojshme, votoi në favor të pranimit të aplikimit të Republikës së Kosovës në KE dhe kërkoi opinionin e Asamblesë Parlamentare (APKiE) mbi këtë aplikim.
Ky është një sukses i rëndësishëm multilateral i Republikës së Kosovës, veçanërisht pas një periudhe të kompromiseve në të kaluarën, të cilat ia pumundësuan Kosovës anëtarësimin në organizata ndërkombëtare.
Tani, na pret një punë intensive në APKiE, organ i cili do të përpilojë një numër raportesh mbi Kosovën dhe do ta jap opinionin e tij mbi anëtarësimin e saj në KE. /InLajmi/
