Drejtori Ekzekutiv i Institutit të Kosovës për Drejtësi, Ehat Miftaraj, ka thënë se si institut shohin mundësinë e një marrëveshje mes Qeverisë Kurti me parterët ndërkombëtarë rreth themelimit të Asociacionit të komunave me shumicë serbe.
Miftaraj, pretendon që përmes kësaj marrëveshje do të ketë kompetenca shtesë sa i përket qeverisjes lokale.
“Ne si IKD e kemi parë që ka mundësi që kemi një marrëveshje mes kryeministrit Kurti me partnerët ndërkombëtarë, ku ndoshta do të kemi kompetenca shtesë, sa i përket qeverisjes lokale, ku këto kompetenca shtesë do të jenë pakësim ose një statut i Asociacionit të komunave me shumicë serbe që do të jetë më i dobët sesa që e kanë menduar ose pritur pala serbe”, tha ai në emisionin “ResPublika” në Tëvë1.
Sipas Miftarajt, nëse Asociacioni nuk do të ketë kompetenca ekzekutive, atëherë statuti do të duhej të përcaktonte një Asociacion që do të kishte ekspertë të cilët do të merreshin me komunat me shumicë serbe në proceset që kanë të bëjnë me ekonominë, arsimin dhe shëndetësinë.
“Nëse Asociacioni i komunave me shumicë serbe nuk do të ketë kompetenca ekzekutive, atëherë ky statut do të duhet të përcaktonte që ta kemi një Asociacion, i cili do të mblidhte pranë vetës ekspertë, të cilët do të mund të ndihmonin komunave me shumicë serbe në proceset që kanë të bëjnë me këshillimin, analizimin e këshillave ligjore apo çështjeve të tjera që lidhen me 3 fusha që janë ekonomia, arsimi dhe shëndetësia. Ky Asociacion me ekspertizën e tyre mund të ju ndihmojë komunave edhe pse kemi 10 komuna me shumicë serbe, kemi komuna ku jetojnë një numër i papërfillshëm i qytetarëve dhe nuk kanë as kapacitete për t’i ushtruar kompetencat dhe përgjegjësitë e tyre në praktikë”, tha drejtori ekzekutiv i IKD-së.
Miftaraj thotë se Asociacioni do të ketë rritje të kompetencave dhe përgjegjësive të 10 komunave me shumicë serbe, shkruan Tëvë1.
“Do të kemi rritje të kompetencave dhe përgjegjësive të 10 komunave, por që kjo do të jetë pastaj në dëm, apo një statut, asociacion me kompetenca shumë më të kufizuara me karakter këshillëdhënës, nëse ky është qëllimi ose ajo çfarë ka menduar Qeveria Kurti, në një mënyrë do të ndikonte që të rriteshin përgjegjësitë e kryetarëve në kuvendet komunale të komunave serbe, qytetarët serbë do të kishin më shumë të drejta, por më pak kompetenca për asociacionin”, shtoi ai.
