Kryeministri i Kosovës, Albin Kurti, ka thënë se zgjedhjet për kryetar në komunat veriore u zhvilluan qetë dhe pa incidente, për të cilat falënderoi KQZ-në dhe Policinë e Kosovës për sigurinë dhe qytetarët për mbështetjen, përcjell InLajmi.
Ndërsa sa i përket pjesëmarrjes së ulët të serbëve në këto zgjedhje, Kurti tha se bojkoti ishte i imponuar nga fushata kërcënuese e Beogradit zyrtar dhe veglave të tij kriminale në terren në veri.
Kryeministri uroi kryetarët dhe asamblistët e zgjedhur dje ndërsa shtoi se ata duhet të punojnë me përkushtim dhe të shërbejnë pa dallim.
Postimi i plotë i tij:
Zgjedhjet për kryetar në 4 komunat veriore të Kosovës dhe për kuvendet komunale në 2 sosh, dje u zhvilluan qetë dhe pa incidente. Falënderoj KQZ-në për organizimin, policinë e Kosovës për sigurinë dhe qytetarët për mbështetjen.
Atmosfera ishte ajo e frikësimit dhe shantazhit andaj edhe dalja e qytetarëve në zgjedhje ishte e ulët. Bojkoti ishte i imponuar nga fushata kërcënuese e Beogradit zyrtar dhe e veglave të tij kriminale në terren në veri. I falënderoj qytetarët për kurajon dhe qetësinë.
Uroj kryetarët dhe asamblistët e zgjedhur dje. Ata duhet të punojnë me përkushtim dhe të shërbejnë pa dallim. Qeveria do t’i përkrahë e ndihmojë. Sistemi institucional dhe shërbimet publike do të mund të funksionojnë më shumë e më mirë. Për mirëqenien e qytetarëve dhe të drejtat e tyre. /InLajmi/
