Vetëm 6 persona kanë votuar deri më tani në qendrën e votimit në Zhazhë të komunës së Zveçanit.
Të drejtë vote në këtë qendër votimi kanë 239 qytetarë që përfshihen komuniteti shqiptar dhe ai serb.
Votuesit deri tani kanë qenë nga komuniteti shqiptar.
E diela e 23 prillit është data kur do të mbahen zgjedhjet e jashtëzakonshme për kryetarë të komunave në Mitrovicën e Veriut, Zubin Potok, Leposaviq dhe Zveçan.
Rreth 360 është numri i vëzhguesve të akredituar nga Komisioni Qendror i Zgjedhjeve (KQZ), për të vëzhguar zgjedhjet e së dielës, më 23 prill, që do të mbahen në 4 komunat e veriut të Republikës së Kosovës.
Nga 44 sa kanë qenë në të kaluarën, kësaj radhe do të jenë 19 qendra votimi, ku shumica prej tyre do të improvizohen në kontejnerë.
Numri i përgjithshëm i qendrave të votimit në këto 4 komuna është 19, me gjithsej 34 vendvotime, prej tyre 6 janë qendra votimi të rregullta, me gjithsej 6 vendvotime, ndërsa 13 qendra të tjera votimi janë alternative, me gjithsej 28 vendvotime, shkruan RTV Dukagjini.
Për zgjedhjet në veri do të shtypen 43 mijë e 500 fletëvotime.
