2 nxënësve të shkollës fillore “Faik Konica” në Prishtinë, të martën u goditën nga energjia elektrike, të cilët u dërguan për trajtim mjekësor në Qendrën e Klinikave Universitare të Kosovës, raporton InLajmi.
Një ditë pas bëhet e ditur se gjendja shëndetësore e 2 nxënësve është stabile edhe pse njëri nga nxënësit ka djegie mbi 16%.
Këtë e konfirmoi për Gazetën InLajmi, mjekja në Repartin e Kirurgjisë Plastike Violeta Zatriqi.
“2 pacientët me plagët e djegies nga goditja e energjisë elektrike janë duke u trajtuar në Repartin e Kirurgjisë Plastike dhe gjendja e tyre për momentin është stabile. Njëri nga pacientët është i djegur 4 % në sipërfaqe të trupit, ndërsa tjetri është nga 15% deri në 17% “, deklaroi Zatriqi për InLajmin.
Mjekja Zartriqi, sqaroi se djegiet që kanë pësuar të 2 nxënësit janë të shkallës së 2 dhe të 3.
“Njëri që ka qenë në mjekimin intenziv tani edhe ai është transferuar në Kliniken e Kirurgjisë Plastike. Djegiet që kanë pësuar 2 pacientët janë njëra e shkallës së 2 e tjetra djegie e shkallës së 3 dhe procedura e trajtimit të tyre bëhet me kujdes të shtuar dhe profesional”, tha Zartriqi.
Gjithashtu, Zartriqi , theksoi se gjendja e tyre aktualisht është stabile dhe se të gjitha intervenimet në trajtimin e tyre janë kryer në mënyrë profesionale dhe sigurisht se gjendja e tyre do të jetë nën vëzhgimin mjekësor edhe në ditët në vijim.
Kujtojmë se të martën në orët e para të mëngjesit policia ka pranuar informatën se 2 persona janë goditur nga energjia elektrike.
Rastin për gazetën InLajmi e konfirmoi zëdhënësja e Policisë së Kosovës për rajonin e Prishtinës, Flora Ahmeti.
“Rreth orës 10:30 kemi pranuar informatën se në rrugën ‘George Bush’ në Prishtinë, 2 persona (të mitur) janë goditur nga rryma elektrike. Personat janë dërguar për tretman mjekësor” , deklaroi Ahmeti për InLajmin.
Më tej Ahmeti bëri të ditur se policia së bashku me institucionet e tjera është duke e trajtuar rastin. /InLajmi/ Libona Gegaj
