Ministri i Punëve të Jashtme i Serbisë, Ivica Daçiq, duke komentuar deklaratën e Gabriel Escobar-it se SHBA-të do t’i njohin zgjedhjet në Kosovë, pa marrë parasysh se siç tha, Serbia do t’i bojkotojë, deklaroi se kështu “i jemi kthyer situatës para Brukselit”, kur ishte e parëndësishme nëse serbët kanë marrë pjesë në zgjedhje dhe në institucione apo jo.
I dërguari i posaçëm i SHBA-së për Ballkanin Perëndimor, Gabriel Escobar, tha se SHBA-të do t’i njohin rezultatet e zgjedhjeve në katër komuna në veri të Kosovës, dhe u bëri thirrje serbëve që të kthehen në institucionet e Prishtinës, shkruan N1info.
Daçiq deklaroi se “marrëveshja e re e Brukselit”, pra pranimi i planit franko-gjerman për normalizimin e marrëdhënieve ndërmjet Beogradit dhe Prishtinës nuk do të thotë as njohje de facto e as de jure e Kosovës, dhe se presidenti serb, Aleksandar Vuçiq, vetëm verbalisht e pranoi atë plan dhe theksoi qartë, sipas Daçiqit, se vijat e kuqe janë mospranimi i pavarësisë dhe mospranimi i anëtarësimit të Kosovës në OKB.
Duke iu referuar akuzave nga Prishtina se duke lobuar në Strasburg ka shkelur Marrëveshjen e Ohrit, e cila parasheh se Beogradi nuk do ta pengojë pranimin e Kosovës në organizatat ndërkombëtare, Daçiq tha se më mirë “të mbulojnë veshët”, transmeton Klan Kosova.
“Kështu thotë ai që prej 10 vjetësh nuk e zbaton marrëveshjen e Brukselit për formimin e Asociacionit të Komunave me Shumicë Serbe. Serbia është e vogël, por nuk është budallaqe. Presidenti Vuçiq flet saktësisht, ne nuk do ta zbatojmë atë për të cilën nuk jemi pajtuar”, tha Daçiq.
