Analistja Arta Tahiri-Beqa vlerëson se marrëveshja mes Kosovës dhe Serbisë aktualisht është në fazën kur ende nuk ka filluar zbatimi.
Ajo ka thënë se propozimi i ambasadorit Agron Bajrami që të monitorojë zbatimin e marrëveshjes nuk duhet të jetë pengesë për Serbinë.
“Çdo projekt e ka fazën e zbatimit, negocimit dhe të mentorimit. Mentorimi është faza e fundit dhe nuk besoj që duhet të jetë problem Ambasadori i Kosovës në këtë fazë sepse të monitorosh është procesi nuk ka filluar. Ne nuk kemi filluar asnjë proces. Dhe nuk kemi asnjë fazë. Ende po flitet do të zbatohet apo nuk do të zbatohet marrëveshja”, ka thënë Tahiri-Beqa.
Analistja kërkon më shumë transparencë nga BE-ja sa i përket drejtimit se nga po shkon zbatimi i marrëveshjes.
“Edhe ambasadori gjerman më herët doli me një deklaratë dhe mbështeti qasjen e kryeministrit Kurti në dialog. Besoj që edhe Borrell edhe Escobar të 2, të cilët ishin shumë të kyçur në takimin e fundit në Ohër dhe Bruksel duhet të dalin me mbështetje apo deklaratë ku tregojnë se në cilin drejtim po shkon i gjithë ky angazhim nga të gjitha palët”, theksoi ajo.
Sipas saj, nëse edhe këtë herë nuk fillon zbatimi i marrëveshjes, BE-ja nuk ka më kredibilitet funksional në dialogun Kosovë-Serbi, shkruan Tëvë1.
“Sepse ne e dimë që ishin 2 muaj aq intensiv saqë nuk është marrë sa duhet me politikat tona ditore të cilat kanë të bëjnë me qytetarët, sa janë marrë me këtë dialog. Besoj dhe shpresoj të mos jemi në fazën zero apo ajo që quhet në Marrëdhëniet Ndërkombëtare null, sepse edhe nëse këtë herë nuk fillon zbatueshmëria e marrëveshjeve, vlerësoj personalisht se kredibiliteti i BE-së në bisedimet Kosovë-Serbi është i zbehtë, mos me thënë i panevojshëm. Atëherë duhet të jenë faktorë të tjerë. Ne e dimë që SHBA kanë qenë vetëm monitorues, por nëse faktorët evropianë nuk japin zgjidhje mendoj që kredibiliteti i tyre nuk është më funksional për këtë çështje”, ka deklaruar Tahiri-Beqa.
