Kryeparlamentari i Kosovës, Glauk Konjufca përkujtoi masakrën në Sllovi të Lipjanit, përcjell InLajmi.
Konjufca përkujtoi 45 martirët shqiptarë, të cilët u vranë dhe u masakruan 24 vjet më parë në krimin e gjenocidit të kryer nga ushtria dhe policia serbe.
Më tej ai tha dëshmorët martirët dhe lufta çlirimtare do të mbeten përgjithmonë në kujtesën e lavdishme kombëtare.
Postimi i plotë i tij:
Sot përkujtojmë 45 martirët shqiptarë, të cilët u vranë dhe u masakruan 24 vjet më parë në krimin e gjenocidit të kryer nga ushtria dhe policia e Serbisë në Sllovi të Lipjanit.
Viktima të kësaj ploje mizore qenë burra, gra, të rinj dhe pleq të paralizuar. Hasanin 18 vjeç e ekzekutuan në sy të babait, ndërsa nënë Halimen 84 vjeçare e dogjën të gjallë.
Shumicën e kufomave i zhdukën me dhunë dhe i fshehën në Serbi, disa u zbuluan vite më vonë në varrezën masive në Batajnicë të Beogradit. Ende mungon drejtësia për viktimat e këtij krimi të gjenocidit.
Dëshmorët, martirët dhe lufta jonë çlirimtare do të mbeten përgjithmonë në kujtesën e lavdishme kombëtare. Janë vetë liria dhe pavarësia e Republikës së Kosovës.
Lavdi e përjetshme! /InLajmi/
