Sekretari amerikan i Shtetit, Antony Blinken, ka thënë të shtunën se rrjedhja e dokumenteve ‘top sekret’ të inteligjencës, nuk ka ndikuar në bashkëpunimin e Uashingtonit me partnerë dhe aleatë.
Duke folur në një konferencë për media në kryeqytetin e Vietnamit, Hanoi, Blinken ka thënë se Shtetet e Bashkuara janë të angazhuara me partnerët dhe aleatët në këtë çështje.
“Bazuar në bisedat që kemi pasur, nuk kam rastisur në diçka që do të ndikonte në bashkëpunimin tonë me partnerë dhe aleatë”, ka thënë Blinken, duke shtuar se ai dëgjuar vetëm “përgëzime” për hapat që ka marrë Uashingtoni, shkruan REL.
Një 21-vjeçar, anëtar i Gardës Kombëtare të Forcave Ajrore të SHBA-së, i akuzuar për rrjedhje të informacioneve të inteligjencës, është akuzuar të premten për kopjim të paligjshëm dhe publikim të materialit të klasifikuar.