Ministrja e Arsimit, Shkencës, Teknologjisë dhe Inovacionit, Arbërie Nagavci, ka bërë të ditur se është finalizuar Ligji për Fëmijërinë e Hershme, raporton InLajmi.
“Një nga prioritet tona ka qenë edukimi i hershëm i fëmijëve. Kemi finalizuar Ligjin për Fëmijëri të Hershme. Element tjetër po aq i rëndësishëm është edhe krijimi i infrastrukturës së duhur për fëmijët. Kemi dhënë zotimin se do t’i ndërtojmë 160 çerdhe gjatë mandatit tonë”
Për më tepër, Nagavci theksoi se Ministria e Arsimit do të fillojë me ndërtimin e çerdheve të parafabrikuara, që sipas saj, janë një trend i ri i agjendës së gjelbër, që shkurtojnë kohën e ndërtimit nga 2 vite në 4 muaj.
“Ndërtimi i çerdheve është drejtuar në 3 drejtime kryesore, ndërtimi i çerdheve të reja dhe rikonstruktimi i atyre të vjetrave. Ndërsa, po fillojmë punën për ndërtimin e çerdheve të parafabrikuara, që është një trend i ri i agjendës së gjelbër që shkurton kohën e ndërtimit nga 2 vite ne 4 muaj. Kanë mundësi që të lëvizin nga nja vend në tjetrin varësisht lëvizjes se popullatës”.
Nagavci shtoi se ka filluar bashkëpunimi me komunat për shpalljen e tenderit për ndërtimin e çerdheve të parafabrikuara.
“Kemi finalizuar edhe studimin e fisbilitietit të çerdheve të parafabrikuara që janë trend në botë. Studimi ka treguar që ekzistojnë mundësitë që ato të krijohen. Ne tashmë kemi filluar një bashkëpunim me komunat dhe kemi filluar që t’i dërgojmë letra kryetarëve të komunave. Shumë shpejt do të kemi takim më kryetarët e komunave që të shtojmë bashkëpunimin në këtë drejtim. Kemi përgaditur gjithë materialin e nevojshëm për shpalljen e tenderit për ndërtimin e çerdheve të parafabrikuara dhe ftoj të gjitha kompanitë që të ofrojnë projektet e tyre”. /InLajmi/
