Gjykata Supreme njofton se ka refuzuar kërkesën e Zyrës së Rregullatorit për Energji (ZRRE) për faturimin e rrymës të qytetarëve për 4 komunat veriore të Kosovës.
Sipas njoftimit, nuk janë të qëndrueshme pretendimet lidhur me arsyetimin e mosinkasimit në 4 komunat e veriut me shkaqe sigurie.
“Nuk janë të qëndrueshme pretendimet lidhur me arsyetimin e mosinkasimit në 4 komunat e veriut me shkaqe sigurie dhe mospasjes qasje në leximin e njehsorëve në atë pjesë, sepse nuk justifikohet që qytetarët tjerë për këto arsye të ngarkohen me pagesën e energjisë elektrike të harxhuar pa një bazë ligjore. Prandaj me këtë faturim dhe pagesë është bërë trajtim jo i barabartë i qytetarëve të Kosovës, e që bie ndesh me nenin 55 par. 4, të Kushtetutës, trajtim i pabarabartë, të cituar si në aktgjykimet e gjykatave të instancave më të ulëta, sepse është bërë kufizim i të drejtave të njeriut”, thuhet në njoftimin Supremës.
Po ashtu, aty thuhet se konsumatorët, pa dijeninë e tyre janë faturuar dhe kanë paguar për energjinë e shpenzuar në veri, shkruan Telegrafi.
“Bazuar në nenin 194 të LMD, konsumatorët, të cilët pa bazë ligjore dhe pa dijeninë e tyre janë faturuar dhe kanë paguar për energjinë e shpenzuar në veri, u lind e drejta për kthimin e shumës së paguar si kanë vendosur gjykatat e instancave më të ulëta”, përfundon njoftimi.
