Koordinatori i Departamentit për Drejtësi në kuadër të Kabinetit për Qeverisje të Mirë të PDK-së, Përparim Gruda, në konferencë për medie, ka thënë se kryeinspektori i Inspektoriatit të Punës Hekuran Nikçi është emëruar në mënyrë të paligjshme, raporton InLajmi.
Sipas Grudës, ky emërim është bërë në kundërshtim me ligjin në fuqi për zyrtarët publik, pasi siç thekson ai, për këtë pozitë nuk ka pasur fare konkurs.
“Vitin e kaluar, me propozim të Ministrisë së Financave, Qeveria e Kosovës, ka emëruar kryeinspektorin e Inspektoratit të Punës, Hekuran Nikçi. Ky emërim është bërë në kundërshtim më ligjin në fuqi për Zyrtarët Publik, pasi për këtë pozitë nuk ka pasur fare konkurs publik”, ka thënë Gruda.
Gruda thekson se Qeveria ka vazhduar të mos e largojë nga detyra Nikçin, ani pse emërimi i tij ka qenë i paligjshëm.
“Përkundër këtij vendimi të Këshillit, Qeveria ka vazhduar të mos e largojë nga detyra kryeinspektorin Nikçi, duke iu drejtuar Gjykatës Themelore në Prishtinë. Edhe në Gjykatën Themelore, Qeveria e ka humbur rastin, pasi gjykata ka refuzuar kërkesën për shtyrje të ekzekutimit të vendimit të KPMSHC-së. Duke mos u bindur bindur, ata janë ankuar në Gjykatën e Apelit. Por, edhe kjo gjykatë e ka refuzuar si të pabazuar ankesën e tyre duke lënë në fuqi vendimin e shkallës së parë”.
Për më tepër, ai thotë se Qeveria vazhdon të bëjë zakon shkeljen e Kushtetutës.
“Imagjinojeni, një person është emëruar dhe mbahet në detyrë në mënyrë të paligjshme në një organ që supozohet të mbrojë të drejtat e punëtorëve. Askund nuk ka ndodhur që Qeveria e një vendi ta bëjë zakon shkeljen e Kushtetutës, ligjeve dhe vendimeve gjyqësore të vendit, siç po e bën Qeveria Kurti. Partia Demokratike e denoncon këtë si një rast të paprecedent të shkeljes së qëllimshme të ligjit dhe vendimet të gjykatave, dhe fton prokurorinë e shteti të që të marrë të gjitha veprimet e nevojshme ndaj personave që nuk i kanë zbatuar vendimet e gjykatave”, ka përfunduar Përparim Gruda. /InLajmi/
