Shefi i politikës së jashtme të BE-së, Josep Borrell, ka shtyrë udhëtimin e planifikuar në Kinë, pasi rezultoi pozitiv me Covid-19, transmeton InLajmi.
Kryediplomati kishte planifikuar të udhëtonte në Kinë nga e enjtja deri të shtunën, pas vizitës së javës së kaluar nga shefja e Komisionit Evropian Ursula von der Leyen dhe presidenti francez Emmanuel Macron.
“Kam rezultuar pozitiv në testin për Covid-19 dhe për këtë arsye për fat të keq do të duhet të shtyj vizitën time në Kinë”, tha Borrell. “Unë ndihem mirë dhe nuk kam simptoma”, shkruan Politico.
Borrell kishte për qëllim të zhvillonte dialogun strategjik vjetor BE-Kinë me ministrin e Jashtëm kinez Qin Gang dhe të takonte shefin e politikës së jashtme të Kinës Wang Yi, si dhe ministrin e ri të Mbrojtjes Li Shangfu. /InLajmi/
