Nëse Amerika dëshiron t’i japë fund luftës në Ukrainë, hapi i parë është ta shikojmë konfliktin me sytë e Kremlinit, kështu shkruan Ivana Stradner, këshilltare në Fondacionin për Mbrojtjen e Demokracisë dhe bashkëpunëtore kërkimore në Institutin “American Enterprise” dhe Natia Seskuria, drejtore ekzekutive e Institutit Rajonal për studime të Sigurisë në Gjeorgji, transmeton InLajmi.
Ndoshta tanket dhe avionët e presidentit rus Vladimir Putin nuk janë të fuqishëm, por mjetet e tij të luftës hibride janë mjaft të fuqishme për të shfrytëzuar tensionet në të gjithë Evropën, duke përfshirë Gjeorgjinë, Moldavinë dhe Ballkanin Perëndimor.
Pavarësisht suksesit ushtarak të dobët të Rusisë në Ukrainë, Putin ka ende në dispozicion mjete të shumta që i ka përdorur për të destabilizuar dhe larguar vëmendjen dhe burimet perëndimore nga Ukraina.
Ndërsa armët bërthamore të Rusisë janë të dukshme, Putini, autoret e lartcekura theksojnë se lideri rus ka bërë një luftë të heshtur dhe të padukshme duke “armatosur” sektorin e energjisë, refugjatët dhe informacionin për të minuar Perëndimin, shkruan Danas.
Autorët kujtojnë se kreu i shërbimit të inteligjencës së jashtme të Rusisë, Sergei Naryshkin, akuzoi Perëndimin javën e kaluar se po përpiqej të hapte një “front të 2-të” kundër Moskës në Gjeorgji.
Dhe e gjithë kjo vjen pasi zyrtarët rusë janë qartazi të zhgënjyer me dështimin e qeverisë gjeorgjiane për t’i bërë ballë presionit publik dhe zbatimin e ligjit për agjentët e huaj.
Pasi parlamenti gjeorgjian miratoi një projektligj për “Transparencën e ndikimit të huaj”, një valë e paprecedentë trazirash përfshiu vendin, duke bërë që edhe segmente apatike të shoqërisë të marshojnë në rrugët e Tbilisit.
Dhjetëra mijëra protestues valëvitën flamujt e Bashkimit Evropian dhe Gjeorgjisë dhe brohoritën “Jo ligjit rus”.
Gjeorgjianët pro-evropianë janë të zemëruar që ligji i propozuar ngjan me ligjin rus të vitit 2012 për agjentët e huaj, të cilin Putin e përdori për të goditur median dhe shoqërinë civile.
Sipas zyrtarëve evropianë, ligji do të dëmtonte shanset e Gjeorgjisë për të marrë statusin e një kandidati për anëtarësim në BE.
Ministri i Jashtëm rus Sergei Lavrov akuzoi Perëndimin për orkestrimin e një skenari tjetër të revolucionit, ndërsa shefja e medias shtetërore RT Margarita Simonyan pretendoi se protestuesit donin të hapnin një front të 2-të konflikti kundër Rusisë.
Edhe Gjeorgjia u kërcënua me një luftë të re nga llogaria diplomatike e Moskës në Krime në rrjetin social Twitter.
Ballkani Perëndimor është një tjetër teatër për lojërat e Moskës dhe Putin përdori skenarin e dhe lojërat e ngjashme.
Presidentja e Kosovës Vjosa Osmani ka deklaruar se Rusia po përdor mercenarë nga grupi famëkeq Wagner dhe grupet paramilitare serbe për të nisur trazirat në Kosovë dhe përfundimisht për të pushtuar territorin.
Ndërsa Serbia dhe Kosova janë në bisedime për normalizimin e udhëhequr nga SHBA-ja dhe BE-ja, grupet nacionaliste pro-ruse serbe po organizojnë protesta, duke akuzuar udhëheqjen e vendit se është në procesin e njohjes formale të Kosovës.
Putin ka ruajtur një shkallë të lartë ndikimi në Serbi përmes institucioneve si Kisha Ortodokse Serbe dhe mediave. Kanali Sputnik ka disa vite që funksionon në Beograd; Moska hapi së fundmi kanalin shtetëror të medias RT.
Në Bosnje, Rusia po rrit retorikën secesioniste të liderit serb të Bosnjës pro-Kremlinit, Milorad Dodik, i cili ka treguar se synimi i tij është miratimi i një ligj për agjentët e huaj.
Në Mal të Zi, Rusia ka përdorur Kishën Ortodokse Serbe për të nxitur destabilitet, dhe përmes serbëve ka krijuar polarizime në vend duke e minuar edhe NATO-N.
Ndërsa humbjet e Rusisë në Ukrainë vazhdojnë të rriten, Kremlini do të vazhdojë të përdorë mjete asimetrike për të provokuar dhe shpërqendruar Perëndimin me Gjeorgjinë, Moldavinë dhe Ballkanin Perëndimor si një tjetër fushë beteje të mundshme.
Ndërsa shumica e vëmendjes së Amerikës është e përqendruar në zhvillimet operacionale në terren, doktrina ushtarake ruse mbështetet në luftën hibride për të përmbushur qëllimet e saj politike dhe ushtarake.
Vetëm kur Perëndimi ta kuptojë këtë, mund të fillojë të ndërmarrë kundërmasa efektive për të kundërshtuar Kremlinin dhe ambiciet e tij gjeopolitike./InLajmi/
