Asociacioni i Gazetarëve të Kosovës ka dënuar ashpër sulmin fizik ndaj gazetarit Valon Syla ndërsa ka kërkuar hetime urgjente për arrestimin e personave përgjegjës për sulmin, përcjell InLajmi.
AGK jep detaje të reja për sulmin ndaj Sylës, duke thënë “Gazetari është sulmuar fizikisht, të martën në mbrëmje nga 3 persona, të cilët dyshohet se e kanë përcjellë atë nga studio e T7, ku ishte i ftuar në debat, deri në lagjen Bregu i Diellit, në Prishtinë”.
Nga AGK theksojnë se ky sulm është i papranueshëm dhe përpjekje serioze për të penguar dhe minuar lirinë e shprehjes dhe lirinë e medies në Kosovë.
Në fund, Asociacioni i Gazetarëve të Kosovës u bën thirrje institucioneve kompetente që të marrin masat e duhura.
Postimi i plotë nga AGK:
AGK-ja e dënon ashpër sulmin e rëndë fizik ndaj Valon Sylës – kërkon hetime urgjente
Gazetari njëherësh drejtuesi i Gazeta Metro, është sulmuar fizikisht, të martën në mbrëmje nga tre persona, të cilët dyshohet se e kanë përcjellë atë nga studio e T7, ku ishte i ftuar në debat, deri në lagjen Bregu i Diellit, në Prishtinë.
Gazetari Syla ka pranuar trajtim mjekësor në Qendrën Klinike Universitare të Kosovës, teksa sipas deklaratave të tij të para për mediet, ka pësuar lëndime në kokë.
Rasti është hapur në Policinë e Kosovës.
Ky sulm për Asociacionin e Gazetarëve të Kosovës është krejtësisht i papranueshëm dhe përpjekje serioze për të penguar dhe minuar lirinë e shprehjes dhe lirinë e medies në Kosovë.
AGK-ja, u bënë thirrje institucioneve kompetente që të marrin masat e duhura që urgjentisht të arrestojnë personat përgjegjës për sulmin dhe që ata të vihen para drejtësisë. /InLajmi/
