Arben Mustafa, koordinator i Departamentit për Financa vlerëson se Qeveria ka bërë gabim me refuzimin e projektit të gazit amerikan.
“Ajo çka i nevojitet Kosovës sot është gjenerimi i kapaciteteve të reja prodhuese. Qeveria e Kosovës ka heq dorë nga gazi amerikan, nga një zgjidhje e cila do të mund të ofronte një zgjidhje afatgjatë të gjenerimit të energjisë elektrike dhe atë opsion e ka zëvendësuar me bateritë të cilat nuk janë zgjidhje e gjenerimit të energjisë elektrike. Kosova sot nuk e ka problemin që nuk po mundet me e ruajtë energjinë e prodhume, por që nuk po mundet me prodhu energji”, ka thënë Mustafa.
PDK vlerëson se sa i përket energjisë elektrike Kosova duhet të orientohet kah kapacitetet e reja ndonëse zgjidhje afatshkurtër e shohin gazin.
“Ajo çka ne konsiderojmë që duhet të bëhet është të orientohemi kah kapacitetet e reja. Përveç gazit nuk shohim një mundësi afatshkurtër në të cilën Kosova mund të orientohet për gjenerimin e kapaciteteve të reja dhe po ashtu duhet të mbështeten projektet e gjenerimit të energjisë elektrike alternative, pra projektet e energjisë elektrike me erë dhe të ngjashme të cilat deri më tani Qeveria e Kosovës duket që i ka bllokuar, nuk mund t’i dimë arsyet pse nuk po i mbështet këto projekte”, ka thënë Mustafa në Këndin e Debatit në Tëvë 1.
Megjithatë ai ka një shpjegim pse Qeveria po fokusohet në import të madh të energjisë.
“Ndoshta dikujt në Qeveri po i konvenon ky aranzhman që e kemi duke u bazuar në import. Sepse tani e dimë që edhe një figurë mjaft e rëndësishme e kësaj Qeverie ka qenë një protagonist shumë i rëndësishëm në tregtinë e energjisë elektrike, pra Martin Berishaj që vazhdon ta gëzojë rolin e ambasadorit përderisa është pjesë e një skandali të madh financiar. Kështu që ajo çka është ka bën kjo Qeveri, po mbështetet në import por asgjë konkrete për ndërtimin e kapaciteteve të reja”, vlerëson ai.
