Kryeministri i Shqipërisë Edi Rama, ka thënë se pagat e reja prej 900 eurosh për vitin 2024 janë frut i një përpjekjeje të gjatë, këmbënguljeje e durimi të madh për reforma të vështira e masa të domosdoshme për ekonominë dhe financat, përcjell InLajmi.
Rama këtë sukses lidhur me pagat e reja ia atrubon punës së përbashkët mes Qeverisë së Shqipërisë dhe çdo shqiptari, të cilët siç thekson ai, kontribuojnë për ekonominë e vendit me punën e tyre.
Ndryshe, vendimi se paga mesatare do të rritet në 900 euro brenda një viti e kishte dhënë vetë Rama ditë më parë pas mbledhjes me qeverinë.
Postimi i plotë i tij:
🇦🇱PAGAT E REJA, falë të cilave paga mesatare në Shqipëri thuajse dyfishohet duke arritur majën historike të 900Eurove në 2024, janë frut i një përpjekjeje të gjatë, këmbënguljeje e durimi të madh për reforma të vështira e masa të domosdoshme për ekonominë dhe për financat tona, rritjeje të të ardhurave falë rritjes së ekonomisë, tregtisë, investimeve publike e private, rritjes së prodhimit e të eksporteve, modernizimit të sistemit të mbledhjes së taksave përmes kompjuterizimit të transaksioneve në kohë reale, lehtësimit e rritjes së shpejtësisë së shërbimeve për biznesin falë digjitalizimit të tyre, forcimit të shtetit në tërësi dhe uljes së ndjeshme të korrupsionit në tatime e dogana, po mbi të gjitha, PAGAT E REJA janë frut i punës sonë të përbashkët, të çdo shqiptari e shqiptareje, që në shtet a në privat, kontribuon për ekonominë shqiptare me punën e vet❤️. /InLajmi/