Deputeti i VV-së, Armend Muja vlerëson se ka pasur një intensitet të madh diplomatik me vendet mosnjohëse.
Megjithatë sipas tij Ministria e Punëve të Jashtme duhet të fokusohet për t’u anëtarësuar në organizata ndërkombëtare, e sipas tij më e rëndësishmja në këtë mes është NATO.
“Por ajo çfarë është e rëndësishme në prioritetin e diplomacisë për mendimin tim është 1) anëtarësimi në NATO. Ajo ta zgjidh dilemën e sigurisë dhe integritetit territorial, është shumë e rëndësishme. Ukraina është sulmu edhe si vend i OKB-së, edhe pse Rusia e ka njoftë. Duheni me pas parasysh këtë evoluim në praktikë. E 2-ta, anëtarësimi në BE si prioritet kyç, sepse e zgjidh dilemën edhe të demokracisë edhe ekonomisë tonë. E 3-ta që është jetike është anëtarësimi në Këshillin e Evropës sepse është element i rëndësishëm edhe për evoluimin e të drejtave të njeriut dhe të drejtave individuale të njeriut. Dhe e katërta është anëtarësimi në OKB dhe organizata ndërkombëtare, sidomos do të thoja te Interpoli, sepse i jep të drejtën policisë që të bashkëpunojë hapur me të gjitha vendet që edhe shërbejnë në Europol por edhe në Interpol. Këtu do të fokusohesha unë po të isha përcaktues”, ka deklaruar Muja.
Duke folur për aplikimin për Këshillin e Evropës, Muja ka thënë se numrat janë siguruar dhe planet kanë qenë që anëtarësimi të bëhet brenda vitit, shkruan Tëvë1.
“Besoj edhe të Këshilli i Evropës janë siguru numrat që të ketë anëtarësim dhe kjo duhet të ndodhë së shpejti por te pjesa tjetër shpresoj, jam mëse i bindur që në Ministri të Jashtëm i kanë bo këto plane…Unë besoj që planet kanë qenë që kjo [anëtarësimi në KiE] të bëhet brenda këtij viti. Pra, në BE veç kemi apliku për vendin kandidat, e dyta në Këshillin e Evropës kemi apliku dhe në këtë rast i kemi siguru edhe votat kurse në Partneritetin për Paqe mendoj së shpejti, po do të ishte një prioritet emergjent sepse kjo pastaj e ndryshon edhe pozitën e Kosovës. Pastaj, anëtarësimi në OKB meqenëse nuk kemi pengesa në bazë të marrëveshjes kërkon projekt në veti”, ka thënë Muja në ResPublika.
