Kryetari i Aleancës për Ardhmërinë e Kosovës Ramush Haradinaj, në 24-vjetorin e eksodit të shqiptarëve të Kosovës ka bërë homazhe te memoriali përkujtimor “Bllaca 99”, përcjell InLajmi.
Haradinaj thekson se represioni nga armiku e mungesa e kushteve elementare për jetesë detyruan shumë shqiptarë që të shpërngulen nga trojet e veta.
Kreu i AAK-së memorialin “Bllaca 99” e cilëson kujtesë kolektive shqiptare.
Tutje Haradinaj shprehet se “Liria e Kosovës ka në themelet e veta edhe ata që dhunshëm u dëbuan nga shtëpitë e tyre. Ata u bënë imazhi i Kosovës që kërkonte të drejtën e vet”.
Në fund, ai shprehet falënderues ndaj të gjithë shqiptarëve që hapën dyert për motrat dhe vëllezërit asokohe.
Postimi i plotë i tij:
Shqiptarët ndër shekuj kaluan nëpër një jetë plot vuajtje. Represioni nga armiku e mungesa e kushteve elementare për jetesë detyruan shumë shqiptarë që të shpërngulen nga trojet e veta.
Në respekt dhe përkujtim të vuajtjeve, por edhe rezistencës të refugjatëve shqiptarë të Kosovës, që kanë kaluar nepër Kampin e Bllacës, sot kisha nderin të marr pjesë në manifestimin përkujtimor “Bllaca 99”.
“Bllaca 99” na ruan kujtimet e gjithë shqiptarëve me shpresën që ndjekjen nga toka e vet kurrë më nuk do ta përjetojë asnjë popull. Kujtojmë vajin e fëmijëve dhe të nënave në qiell të hapur duke ikur nga vdekja. Kjo është një nga monumentet e kujtesës kolektive dhe të mësimit se sa e shtrenjtë është liria dhe sa e dhimbshme dhe sa shumë sakrifica ka rruga deri te kjo liri.
Liria e Kosovës ka në themelet e veta edhe ata që dhunshëm u dëbuan nga shtëpitë e tyre. Ata u bënë imazhi i Kosovës që kërkonte të drejtën e vet.
Falënderim përjetë për gjithë shqiptarët që hapen dyert për motrat dhe vëllezërit e tyre, që ofruan bukën, strehën por edhe shpresën!
Falënderues përjetë botës së qytetëruar, udhëheqësve të asaj kohe; Bill Clinton, Madeleine Albright dhe Tony Blair! /InLajmi/
