Kryeministri i Kosovës, Albin Kurti këtë të diele uroi besimtarët katolikë me rastin e festës së Pashkëve, përcjell InLajmi
I pari i ekzekutivit deklaroi se më shumë se kurrë kemi nevojë për besim, mirëkuptim dhe respekt të ndërsjellë, që t’i kalojmë të gjitha pengesat me durim e t’i kremtojmë arritjet me gëzim.
Më tej Kurti tha se festa e Pashkës është festë e shpresës, besimit dhe dashurisë së përjetshme, ku jeta mposht vdekjen dhe drita mposht errësirën.
Postimi i plotë i tij:
Urime Pashkën besimtarëve katolikë e protestantë!
Urime për të gjitha familjet që e shënojnë këtë festë të shenjtë e të madhe.
Më shumë se kurrë kemi nevojë për besim, mirëkuptim dhe respekt të ndërsjellë, që t’i kalojmë të gjitha pengesat me durim e t’i kremtojmë arritjet me gëzim.
Le t’ia përkujtojmë njëri-tjetrit se me më shumë vendosmëri e besnikëri, të inkurajuar nga shpresa e të mbrujtur nga përkushtimi, së bashku, ndërtojmë një shoqëri të mirëkuptimit dhe solidaritetit.
Le të frymëzohemi nga gëzimi që vjen pas sakrificës së madhe, nga gëzimi i ringjalljes, nga kumti i Pashkës për më shumë përgjegjësi dhe unitet.
Kjo kohë e mirësisë dhe afërsisë së vërtetë reflektohet edhe në kujdesin për fqinjët tanë.
Le të tregojmë solidaritet dhe vullnet për të ndihmuar të tjerët.
Festa e Pashkës është festë e shpresës, besimit dhe dashurisë së përjetshme, ku jeta mposht vdekjen dhe drita mposht errësirën.
Ajo evokon devocionin dhe tregon rrugën e ripërtëritjes dhe rilindjes.
Na inspiron për të arritur fitoren e së mirës mbi të keqen me fuqinë e shpirtit tonë.
Për shumë mot urime Pashkën! /InLajmi/
