Ministri i Mbrojtjes, Armend Mehaj këtë të dielë ka përkujtuar 24-vjetorin e Betejës së Koshares, përcjell InLajmi.
Këtë betejë Mehaj e ka përshkruar si një prej momenteve më të lavdishme të luftës së popullit tonë për çlirim dhe bashkim kombëtar.
Më tej ai ushpreh mirënjohës për luftëtarët dhe të gjithë të rënët në këtë betejë.
Postimi i plotë i tij:
Sot kujtojmë 24 vjetorin e Betejës së Koshares, një prej momenteve më të lavdishme të luftës së popullit tonë për çlirim dhe bashkim kombëtar.
Kujtojmë brigadën 138 me në krye heroin e kombit, dëshmorin Agim Ramadani, si dhe 100 të rënët e kësaj beteje, ushtarët e Ushtrisë Çlirimtare të Kosovës të ardhur nga treva të ndryshme që për asnjë moment nuk iu frikësuan armikut as vdekjes, ngase të guximshëm e stoik i mbante dashuria për atdheun dhe besimi i pashoq se duhet luftuar për lirinë e popullit e për tokën e trashëguar ndër breza.
Ishte pikërisht në këtë betejë e nga kjo brigadë që u largua kufiri i pakuptimtë ndërmjet shqiptarëve i imponuar nga pushtimi jugosllav, duke i bërë bashkë në këtë mënyrë fizikisht shqiptarët e të dyja anëve, vendasit e tokës ilire që i bashkon gjuha e tradita, e kaluara dhe e ardhmja, kombi që nuk njeh ndarje fizike ngase e pashkëputshme është lidhja emocionale për këto troje e për njëri-tjetrin.
Nderime për të gjithë të rënët e të plagisurit e kësaj beteje. Nderime për sakrificën e tyre dhe për veprën që si e gdhendur në gurë do të mbetet e pashlyer në memorien tonë e në historinë e kombit. Mirënjohës gjithmonë!
Lavdi! /InLajmi/
