Me vlerën e koeficientit të ri të Ligjit të Pagave kanë mbetur të pakënaqur shumë punëtorë të sektorit publik, të cilët më pas i janë drejtuar Institucionit të Avokatit të Popullit, për të paraqitur ankesat e tyre lidhur me këtë koeficient, shkruan InLajmi.
Përfaqësuesit e sindikatave janë shprehur vazhdimisht se punëtorët janë të pakënaqur me koeficientin e ri në vlerë prej 100 eurosh sipas Ligjit të ri të Pagave, ndërkohë që pritjet kanë qenë që vlera të jetë së paku 150 euro. Kërkesat e vazhdueshme të sindikatave që vlera e koeficientit të jetë më e lartë se koeficienti aktual nuk janë marrë parasysh nga Qeveria e Kosovës me arsyetimin se ky koeficient krijon barazi mes kategorive dhe nivelizim të pagave.
Për mospajtimin me koeficientin e ri të pagave, institucione por edhe individë kanë paraqitur ankesë te Avokati i Popullit ndërsa ky i fundit mbetet t’i drejtohet Gjykatës Kushtetuese për shqyrtimin e ankesave.
Petrit Çollaku, zyrtar për komunikim për Gazetën InLajmi konfirmoi se në adresë të Avokatit të Popullit kanë arritur 81 ankesa kundër Ligjit të Pagave.
“Deri më tani, Institucioni i Avokatit të Popullit ka pranuar 81 ankesa kundër Ligjit për Paga në sektorin publik. Nga ky numër, 31 ankesa janë individuale, 11 ankesa janë nga sindikatat, dhe të tjerat vijnë nga sektorë të ndryshëm”, tha Çollaku.
Çollaku theksoi se të gjitha ankesat janë konsideruar si të pranueshme nga Institucioni i Avokatit të Popullit derisa shtoi se janë duke i analizuar këto ankesa dhe më vonë do të dalin me një qëndrim.
“Të gjitha këto raste janë konsideruar si të pranueshme në IAP. Institucioni i Avokatit të Popullit është duke i trajtuar këto ankesa, dhe po ashtu është duke analizuar ligjin në fjalë, dhe pas kësaj, Avokati i Popullit do të del me një qëndrim në lidhje me këtë çështje. Ju informojmë se sipas afateve ligjore, Institucioni i Avokatit të Popullit ka në dispozicion 6 muaj për të shqyrtuar ligjin në fjalë, që nga hyrja në fuqi”, tha Çollaku për InLajmin.
Ndërkohë, pas procesit të shqyrtimit të ankesave pritet shumë shpejt që Avokati i Popullit t’i adresojë ato në Gjykatën Kushtetuese për t’i dhënë epilog pakënaqësive të punonjësve të sektorit publik. Shqipe Vishaj /InLajmi/
