Deputetët e Listës Serbe u panë të marrin pjesë në seancën e Kuvendit të Kosovës pas 5 mujave mungesë vetëm sa për të nënshkruar. Sipas Kushtetutës së Kosovës, mandati i deputetit mbaron ose bëhet i pavlefshëm nëse ai mungon 6 muaj rresht në seancat e Kuvendit, raporton InLajmi.
Kjo ardhje nuk ju zgjati shumë, pasi pas 10 minutave u larguan nga Kuvendi i Kosovës, mirëpo kjo nuk u la pa u vërejtur nga kryetari i Kuvendit të Kosovës, Glauk Konjufca, i cili e quajti sjellje të papërgjegjshme nga e deputetëve.
“Ajo çka bëri Lista Serbe sot me ardhjen pas 5 muajsh e sa ditëve në Kuvendin e Republikës së Kosovës vetëm për t’u nënshkruar është sjellja më e papërgjegjshme. Ata qëndruan për 10 minuta dhe u larguan”, tha Konjufca.
Por kjo nuk mbeti me një vërejtje, pasi kryetari Konjufca kërkoi që deputetëve të Listës Serbe t’u hiqen mëditjet e sotme.
“Më e pakta që mund të kërkoj është që këta deputetë të privohen nga mëditjet e sotme”, tha Konjufca në seancën e Kuvendit të Kosovës. /InLajmi/
