Kryeministri i vendit Albin Kurti, ka marrë pjesë në koferencën e realizuar në kuadër të Ministrisë së Punëve të Brendshme “Strategjia e e-Qeverisjes në funksion të përmirësimit të ofrimit të shërbimeve publike”, raporton InLajmi.
Kurti theksoi se strategjia e e-qeverisjes ndikon në rritjen e vazhdueshme të ekonomisë së vendit ndërsa shtoi se Kosova është një nga top vendet për digjitalizim dhe mund të krahasohet me Zvicrën dhe Luksemburgun.
“Strategjia e e-qeverisjes e vendos vizionin tonë për një administratë të digjitalizuar dhe me efekt e transparente. Ndikon në rritjen e vazhdueshme të ekonomisë së vendit. Një nga këto parimet janë vendosja e qytetarit në qendër të eliminojnë burokracinë dhe të kursejnë kohën. Një parim tjetër është gjithpërfshirja. Kosova është në top vendet për digjitalizim dhe krahasohet me Zvicrën dhe Luksemburgun”, u shpreh Kurti.
Kryeministri tha se Kosova ka shënuar progres të mirë në digjitalizimin e administratës publike.
“Strategjia adreson çështjet aktuale dhe formulon objektiva dhe veprime specifike për tejkalimin e tyre dhe arritjen e qëllimeve strategjike. Kosova ka shënuar progres të mirë në digjitalizimin e administratës publike duke përcaktuar digjitalizimin si një nga prioritetet e saj, por strategjia thekson mundësitë për qasje më koherente dhe sistematike ndaj digjitalizimit në sektorin publik për t’i nxitur më tej përpjekjet për digjitalizim”, tha Kurti. /InLajmi/
