Kryetari i Partisë Demokratike të Kosovës, Memli Krasniqi, në seancën e Kuvendit të Kosovës akuzoi qeverinë Kurti, ndërsa migrimi i qytetarëve tha ai është treguesi më i mirë sa janë të kënaqur qytetarët me këtë qeverisje, raporton InLajmi.
Krasniqi theksoi se brenda ditës mesatarisht lëshojnë vendin 147 persona në kërkim të një jete më të mirë.
“Përgjatë 2 viteve të fundit, mesatarisht 147 persona në ditë e lëshojnë Kosovën, për të kërkuar një jetë më të mirë larg vendit. Mesatarisht, mbi 1000 qytetarë në javë. Pra, gjatë 2 viteve të qeverisjes suaj, 107.310 qytetarë të Kosovës kanë ikur nga Kosova. Jo si turistë, po si mërgimtarë që kanë humbur shpresën e besimin në perspektivën që mund ta ofroj shteti jonë. Të reja e të rinj, vet e me familje. Nga fshati e nga qyteti, nga çdo cep i Kosovës. Të papunë e të punësuar. Mjekë e mësimdhënës. Infermierë e arkitektë. Inxhinierë e bankerë. Nga çdo kategori sociale”, tha kreu i PDK-së.
Krasniqi e ftoi kryeministrin Kurti t’iu shpjegojë rreth 100.000 familjeve, të cilave ju kanë ikur fëmijët gjatë qeverisjes së tij, se çfarë suksesesh ka arritur për këto 2 vite.
“Kosova po zbrazet. Vendi ynë po shpopullohet. Familjet tona po zvogëlohen. Kjo është fytyra e vërtetë e qeverisjes tënde, kryeministër. Ky migrim i paprecedent flet më së miri se sa janë të kënaqur njerëzit dhe familjet me punën tënde”, shtoi ai.
Më tej ai tha se deklaratat e Kurtit nuk kanë asnjë vlerë ku i kërkoi të mos merret me deputetet por me qytetarët.
” Çkado që flet sot Kryeministër, nuk e ka asnjë vlerë. Mos u merr me neve këtu në Kuvend. Tregoju atyre rreth 100 .000 familjeve që ju kanë ikur fëmijët gjatë qeverisjes tënde se çfarë suksese ke arritur me qeverisjen e sa mirë ua ke përmirësuar jetën”,tha Krasniqi. /InLajmi/
