Agjencia e Kosovës për Inteligjencë ka bërë të ditur se në Rashkë të Serbisë po zhvillohen stërvitje nga e ashtuquajtura “Mbrojtja Civile” në bashkëpunim me Listën Serbe, raporton InLajmi.
Kryetarja e Komisionit për Mbikëqyrjen e Agjencisë së Kosovës për Inteligjencë, Ganimete Musliu, theksoi se këto stërvitje kanë për qëllim destabilizimin e veriut.
Musliu tha se këtë informacion ia ka dhënë drejtori i AKI-së, Petrit Ajeti.
“E ashtuquajtura Mbrojtja Civile në bashkëpunim edhe me Listën Serbe atje në vazhdim kanë aktivitete në veri të vendit. Pjesëtarët e kësaj organizate po trajnohen në Rashkë për veprime desatbilizuese në Kosovë. Atje vazhdon djegja e veturave të qytetarëve me targa RKS. Po ashtu linçimi dhe presoni është rritur ndaj prestarëve që nuk i binden Listës Serbe. Prandaj, si shtet duhet të përgatitemi për çdo provokim të situatës që mos të na zë në befasi. AKI po e kryen punë me sukses dhe e ka përkrahen e Komisionit për veprime konkrete. Unë flas zyrtarisht si institucion, është e konfirmuar, janë duke u stërvitur në Rashkë që mund të merren në veri të Kosovës, ka stërvitje, gjuajte me armë, taktizim”, u shpreh Musliu.
Tutje, ajo përmendi faktin se gjendja e sigurisë në Kosovë konstatohet të jetë stabile në përjashtim të 4 komunave veriore, ku ka tendenca për destabilizim.
“Nga drejtori u njoftuam rreth gjendjes së sigurisë në vend. Drejtori na raportoi në detaje për punën dhe aktivitetet e tij. Ky ishte një raportim i rregullt, por fokusi ishte në gjendjen e sigurisë ne veri të vendit ku tash edhe jemi në prag të zgjedhjeve. Gjendja e sigurisë në Kosovë konstatohet të jetë stabile në përjashtim të 4 komunave në veri të vendit ku ka tendenca për destabilizim”, tha Musliu./InLajmi/
