Para mbajtjes së “Marshit për Drejtësi”, Policia e Kosovës u ka bërë thirrje qytetarëve që të marshojnë qetë dhe që kërkesat e tyre t’i shpalosin në mënyrë demokratike, përcjell InLajmi.
Policia e Kosovës njofton se ka bërë përgatitjet e nevojshme operacionale policore për ruajtjen e rendit dhe qetësisë publike gjatë mbarëvajtjes së marshit.
Në njoftimin e policisë, thuhet se “Do të ndërmerren masat e nevojshme preventive, operative policore për të siguruar që mbarëvajtja e marshit të kalojë pa ndonjë incident, që pjesëmarrësit të shprehin qëllimin e tyre në mënyrë demokratike”.
Njoftimi i plotë nga Policia e Kosovës:
Angazhimet e Policisë së Kosovës në mbarëvajtjen e marshit
Prishtinë, 2 prill 2023
Policia e Kosovës me qëllim të ruajtjes së rendit dhe qetësisë publike si dhe mbarëvajtjes së marshit të paraparë të mbahet, sot më 02.04.2023 në orët e pasdites në Prishtinë, ka bërë përgatitjet e nevojshme operacionale policore.
Lidhur me këtë PK-ja, ka filluar me kohë përgatitjen dhe ndërmarrjen e masave që kanë për qëllim mbarëvajtjen e marshutës, ruajtjen e rendit dhe sigurisë publike, ofrimin e sigurisë për qytetarët dhe ofrimin e sigurisë në trafik.
Policia do të ndërmerr masat e nevojshme preventive, operative policore për të siguruar që mbarëvajtja e marshutës të kalojë pa ndonjë incident, që pjesëmarrësit të shprehin qëllimin e tyre në mënyrë demokratike.
Sipas procedurave të parapara policia do të merr masa dhe do të shtojë aktivitetet operative para, gjatë dhe pas përfundimit të marshutës, andaj ftojmë qytetarët pjesëmarrës që të marshojnë të qetë dhe që kërkesat e tyre t’i shpalosin në mënyrë demokratike. /InLajmi/
