Djegia e vetura me targa RKS në veri të vendit është duke vazhduar, kjo pasi edhe 3 të tjera janë djegur mbrëmjen e së premtes në Komunën e Leposaviqit.
Lajmin për djegien e 3 veturave në Leposaviq e kanë konfirmuar edhe nga Policia e Kosovës.
E pas djegies së 3 veturave të premten mbrëma sërish ka reaguar Blerim Vela, shefi i kabinetit të presidentes Vjosa Osmani.
Vela ka thënë se strukturat ilegale të Serbisë janë duke përdor taktika kriminale dhe terrorizuese.
“3 makina të tjera janë djegur në Leposaviq. Të diskredituara dhe me mbështetjen e pakësuar nga serbët e Kosovës, strukturat ilegale të Serbisë po përdorin taktika kriminale dhe terrorizuese. Sundimi i ligjit do të mbizotërojë dhe çdo fajtor do të sillet para drejtësisë. Regjimi piroman i Vuçiqit do të dështojë”, ka shkruar Vela
Ndryshe, gjatë 2 ditëve të fundit janë djegur edhe 5 vetura tjera me targa RKS në veri të vendit, 2 më 30 mars dhe 3 tjera me 31 mars. Djegia e veturave në veri ka ngjallur reagime të shumta si nga zyrtarët vendorë, po ashtu edhe ndërkombëtarë, duke i quajtur akte frikacake dhe kriminale.
