Finlanda do të bëhet anëtarja e 31-të e NATO-s, pasi parlamenti i Turqisë votoi për miratimin e aplikimit të saj, transmeton InLajmi.
Turqia e kishte vonuar anëtarësimin e Finlandës për t’u bashkuar me aleancën mbrojtëse të Perëndimit për muaj të tërë.
Suedia, e cila aplikoi për t’u bashkuar me NATO-n në të njëjtën kohë majin e kaluar, është ende duke u bllokuar nga Ankaraja për ankesa të ngjashme.
Çdo zgjerim i NATO-s ka nevojë për mbështetjen e të gjithë anëtarëve të saj.
Finlanda tani do të pranohet zyrtarisht në NATO në samitin e saj të ardhshëm, që do të zhvillohet në korrik në Lituani.
Në një deklaratë pas votimit turk, qeveria finlandeze tha se bashkimi me aleancën do të forconte sigurinë e vendit dhe do të përmirësonte stabilitetin dhe sigurinë në rajon.
Presidenti turk Rexhep Tajip Erdogan dha miratimin e tij për ofertën e Finlandës në fillim të këtij muaji, duke vlerësuar “hapat autentikë dhe konkretë” të vendit për sigurinë turke, shkruan BBC.
Por armiqësia e tij e vazhdueshme ndaj Suedisë ishte e qartë, pasi ai akuzoi vendin se përqafon militantët kurdë dhe i lejonte ata të demonstronin në rrugët e Stokholmit. /InLajmi/
