Drejtoresha e Arsimit në Prishtinë, Besianë Musmurati bëri të ditur se pas ligjëratave të ushtarëve të UÇK-së në disa prej shkollave të Prishtinës, fëmijët kanë realizuar punime të ndryshme, përcjell InLajmi.
E këto punime sipas Musmuratit do i dërgohen liderëve të UÇK-së që po mbahen në Hagë.
Ajo me tej tha se shpreson që me anë të këtyre letrave të përçohet mirënjohja e thellë që ata si komunë kanë për UÇK-në.
Postimi i plotë i saj:
Po i dërgojmë në Hagë letrat dhe vizatimet e fëmijëve të Prishtinës për ushtarët e UÇK-së
Pas ligjeratave të ushtarëve të UÇK-së në disa prej shkollave të Prishtinës, fëmijët bënë punime të ndryshme që i shpërndamë në OVL të UÇK-së. Disa prej tyre po i dërgojmë tek liderët e UÇK-së që po mbahen në Hagë.
“Mrekullive të botës duhet ti shtohet edhe lufta çlirimtare e UÇK-së” shkruan Leka nga shkolla Naim Frashëri.
“Unë ende kam besim te njerëzimi sepse ende kam besim tek ju. Na keni treguar herë pas here se ne mund t’ju besojmë. Andaj, ju jeni heronjtë tanë!” thotë Erza, e cila ka lindur në vitin që është shpallë Pavarësia.
“Ndoshta sot je me thinja, por ne do të kujtojmë gjithmonë për zgjuarsinë, trimërinë dhe sakrificën që e ke bërë për fëmijët e Kosovës” thotë letra tjetër.
Shpresojmë që me këto letra do të mund të përçojmë mirënjohjen e thellë që e kemi për UÇK-në dhe vlerat e saj. /InLajmi/
