Qoftë me një koleg apo të njohur, të gjithë bëjmë biseda të vogla, pavarësisht sesa mund ta urrejmë këtë. Shumica prej nesh i fillojmë këto biseda me pyetjen tipike “Si je?”. Mirëpo, studiuesit në Universitetin e Harvardit po u thonë njerëzve që ta shmangin pyetjen e famshme “Si je?” kur bëhet fjalë për biseda dhe përshëndetje të vogla.
Ekspertët e sugjerojnë këtë ndryshim për të përmirësuar aftësitë tona komunikuese. Në vend të kësaj pyetjeje, ata kanë sugjeruar një sërë frazash të tjera për t’i gërshetuar në bisedat e përditshme.
Në vend që të thoni një “Si je?” mekanike, ju mund të bëni pyetje më cilësore dhe sipas studiuesve, kjo do t’ju bëjë edhe më të pëlqyeshëm tek të tjerët.
Ekspertët shpjegojnë se ju mund të pyesni “çfarë të emocionon tani?” për t’i dhënë marrësit “aftësinë për të dhënë një përgjigje në lidhje me punën, ose për të folur për fëmijët e tyre, nipërit, ose në thelb çdo gjë që i emocionon ata”.
Po kështu, një zgjedhje tjetër mund të jetë “çfarë po prisni këto kohë?” dhe përgjigjja mund të jetë një lajm, rezultati i një aplikimi apo një person i dashur, transmeton Anabel Magazine.
Nëse doni ta çoni bisedën në një nivel pak më të thellë mund të pyesni edhe “cila është gjëja më e rëndësishme që duhet të di për ju?”. Kjo është një nga ato pyetjet e hapura që i jep personit mundësinë të përgjigjet si të dojë ai dhe të zbulojë çfarë do nga vetja.
