Kryeministri Albin Kurti, ka marrë pjesë në lansimin e projektit “Përafrimin e ligjeve dhe politikave me Konventën e Stambollit”, raporton InLajmi.
Kurti theksoi se dhuna ndaj grave dhe vajzave ka qenë dhe vazhdon të jetë shqetësuese përgjatë viteve të fundit në Kosovë.
Ai tha se Qeveria e Kosovës ka miratuar strategjinë kundër dhunës ndërsa shtoi se dhuna në familje në baza gjinore duhet të luftohet nga të gjithë.
“E kemi miratuar strategjinë kundër dhunës. Kemi mundësuar ndihmë juridike falas për viktimat, kemi vazhduar mbështetjen e viktimave të dhunës seksuale gjatë luftës. Këtë vit do të shtohet buxheti për strehimoret. Duhet të adresohen nevojat e grave, prandaj me qëllim të fuqizimit të grave kemi ndërmarr hapa konkret për një Kosovë me barazi mes burrave dhe grave. Gjatë vitit 2022 mbi 5 mijë gra janë punësuar për mes masave. Me projektin ‘Superpuna’ janë punësuar mbi 1.400 vajza. Për të ndihmuar arsimin e vajzave kemi ndarë bursa për gra. Nga buxheti 2 milionë euro janë ndarë për bursa për gra dhe vajza. Dhuna ndaj grave dhe vajzave kanë qenë shqetësuese gjatë viteve, dhe na nevojitet bashkëpunim maksimal më institucionet e ndryshme. Do të punojmë për eliminimin e dhunës ndaj grave dhe vajzave, nuk mund të kemi barazi shoqërie pa pasur barazi gjinore. Dhunën në familje dhe në baza gjinore duhet ta luftojmë të gjithë”, tha Kurti. /InLajmi/
