Kryetari i Kuvendit të Kosovës, Glauk Konjufca, është takuar me emisarin amerikan për dialogun, Gabriel Escobar, me të cilin kanë diskutuar për zhvillimet politike në vend dhe rajon, përcjell InLajmi
Konjufca, bëri të ditur se fokusi i diskutimeve ishte procesi i dialogut dhe marrëveshja e Ohrit, si dhe hapat e mëtejmë për normalizimin e plotë të marrëdhënieve ndërmjet Republikës së Kosovës dhe Serbisë.
Për më tepër, Konjufca bëri të ditur se në takim me Escobar riktheksuam qëndrimi i shtetit të Kosovës, por edhe garantimin e Departamentit të Shtetit se nuk mund të formohet asociacion i cili cenon sovranitetin, pavarësinë dhe rendin kushtetues të Kosovës.
Postimi i plotë i tij:
Sot, në kuadër të vizitës sime zyrtare në Shtetet e Bashkuara të Amerikës, i shoqëruar nga ambasadori i Republikës së Kosovës në Washington DC, Ilir Dugolli dhe Shefi i Stafit, Ilir Kërçeli, takova Zëvendës Ndihmës Sekretarin e Shteteve të Bashkuara të Amerikës njëherësh Përfaqësues Special për Ballkanin Perëndimor, z.Gabriel Escobar.
Në takimin përmbajtësor me z.Escobar diskutuam për zhvillimet aktuale politike në vend dhe rajon, për procesin e dialogut dhe marrëveshjen e Ohrit, si dhe hapat e mëtejmë për normalizimin e plotë të marrëdhënieve ndërmjet Republikës së Kosovës dhe Serbisë.
Ritheksuam qëndrimin e shtetit të Kosovës, por edhe garantimin e Departamentit të Shtetit, se nuk mund të formohet kurrfarë asociacioni apo ndonjë mekanizëm tjetër që cenon sovranitetin, pavarësinë, integritetin territorial dhe rendin kushtetues të Republikës së Kosovës.
Ndamë pikëpamje të njëjta që të vazhdojmë të punojmë së bashku për agjendën e përbashkët të anëtarësimit të Kosovës në strukturat euroatlantike dhe organizata ndërkombëtare, e po ashtu edhe për avancimin e marrëdhënieve dypalëshe mes Republikës së Kosovës dhe Shteteve të Bashkuara të Amerikës. /InLajmi/
