Presidentja e Republikës së Kosovës Vjosa Osmani, ka bërë homazhe te Memoriali në Izbicë të Skenderajt, raporton InLajmi.
Osmani theksoi se masakra e Ibicës ka qenë një ndër masakrat më të tmerrshme që ka bërë Serbia ndaj popullit shqiptar.
Tutje, ajo tha se krimi i Serbisë u dyfishua kur forcat serbe zhvarrosën të vrarët dhe i rivarrosen në vende të ndryshme në Serbi dhe Kosovë.
“Kjo ka qenë një ndër masakrat më të tmerrshme të Serbisë, të shtetit gjenocidal serb ndaj popullit shqiptar. Dhe krimi nuk përfundoi me vrasjen dhe masakrimin e qytetarëve tanë në Izbicë, por u dyfishua atëherë kur forcat serbe zhvarrosën të vrarët dhe i rivarrosën ata në varrezat masive në vende të ndryshme në Serbi dhe në Kosovë”, tha Osmani.
Presidentja tha se liria u bë e mundur shkaku i të gjithë viktimave dhe luftës së drejtë të Ushtrisë Çlirimtare të Kosovës.
“Trupat e tyre u gjendën vite më pas, duke përfshirë edhe 6 muajshe Dafinën që e tregon mizorinë e krimeve që Serbia ka kryer në Kosovë. Edhe Izbica është një ndër dëshmitë e shumta që shteti serb ka kryer gjenocid dhe qëllimin e kishte ta shfaroste popullin shqiptar. Ndaj edhe sot këtu ndajmë dhimbjen me të gjitha familjet që kanë humbur më të dashurit e tyre, sepse dhimbja e tyre është dhimbje e Kosovës. Liria u bë e mundshme shkaku i të gjitha këtyre viktimave, shkaku i luftës së drejtë të Ushtrisë Çlirimtare të Kosovës dhe natyrisht sakrificës së të gjithëve”, tha tutje Osmani. /InLajmi/
