Kryetari i Partisë Demokratike të Kosovës Memli Krasniqi, në 24 vjetorin e masakrës së Izbicës ka bërë homazhe te memoriali i 147 martirëve të vrarë nga regjimi kriminal serb, përcjell InLajmi.
Krasniqi theksoi se gra, fëmijë, burra e pleq janë vrarë gjithandej, pa shkak e pa mëshirë nga forcat serbe.
Tutje, ai tha se janë mbi 400 masakra të kryera nga forcat serbe mbi popullsinë shqiptare ndërsa shtoi se pak nga autorët e këtyre krimeve kanë dalë para drejtësisë.
Postimi i plotë i tij:
Sot, kujtojmë dhe nderojmë 147 martirët e një prej masakrave më të mëdha në Kosovë, asaj të Izbicës, të cilët, 24 vite më parë u vranë mizorisht nga regjimi kriminal serb. Pas fillimit të bombardimeve të NATO-s, të vetëdijshëm për fundin që po u vinte, Serbia shtoi intensitetin e fushatës së tyre gjenocidale në Kosovë, përmes dëbimit, vrasjeve e masakrave mbi civilë të pafajshëm.
Gra, fëmijë, burra e pleq vriteshin gjithandej, pa shkak e pa mëshirë. Fatkeqësisht, janë mbi 400 masakra të kryera mbi popullësinë civile shqiptare, për të cilat, fare pak urdhërdhënës dhe ekzekutues kanë dalë para drejtësisë. Prandaj, edhe në këtë përvjetor të dhembjes, njëkohësisht krenarisë tonë kombëtare, thërrasim për drejtësi, të cilën akoma e presin dhe kërkojnë familjarët, shoqëria dhe shteti ynë.
Lavdi të përjetshme të rënëve të Kosovës – dritës e diellit së lirisë dhe të ardhmes tonë! /InLajmi/
