Turistët që erdhën nga jashtë kanë harxhuar më shumë para në Shqipëri se shqiptarët që pushuan në vend të huaj.
Në vitin 2022, të huajt shpenzuan 2.8 miliardë euro në Shqipëri, ndërsa nga vendi ynë dolën rreth 1.8 miliardë euro. Me diferencën një miliard euro, Shqipëria shënoi rekord historik në të ardhurat e grumbullura nga turistët.
Prej disa vitesh Shqipëria është kthyer në një vend të pëlqyer, duke investuar në hoteleri e aktivitete të tjera shërbimesh e argëtimi.
Investimi, çmimet dhe reklama jashtë vendit kanë rritur flukset nga jashtë, dhe përveç fqinjëve nga Kosova, Mali i Zi e Maqedonia e Veriut, flukset e shtuara po shihen edhe nga Europa Lindore, vendet nordike dhe lindja e mesme.
Të dhënat e INSTAT tregojnë së në vitin 2022 hyrjet e të huajve arritën një rekord prej 7.5 milionë shtetasish, me një rritje rreth 35% në krahasim me 2021-n.
Përveç plazheve dhe turizmit malor, vitin e kaluar Shqipëria joshi vizitorë edhe me aktivitete sportive si ai i finales së Conference Leage me ndeshjen Roma-Fejnord dhe disa festivale muzikore në Tiranë, Dhërmi, Shëngjin e Kavajë, shkruan Telegrafi.
Nga ana tjetër edhe shqiptarët që kanë dalë jashtë vendit, kanë pasur mundësi dhe oferta më të mira që nga linjat e udhëtimit e deri tek ofertat e hoteleve ku kanë rezervuar. Lehtësimi i kufizimeve nga pandemia, ishte një arsye e shtuar për këto udhëtime.
