Në takimin e 18 marsit në Ohër mes Kosovës dhe Serbisë ka pasur një pajtueshmëri mes 2 palëve që pika 4 e aneksit të marrëveshjes për normalizim, ta përfshijë çështje e të pagjeturve nga lufta e fundit në Kosovë, si çështje urgjente.
Por se a do të sjellë ndonjë rezultat kjo marrëveshje për të pagjeturit, për këtë ka folur kryetarja e Komisionit për të Drejtat e Njeriut dhe Personave të Pagjetur, Duda Balje.
Balje tha se tani është momenti i duhur për të gjetur një zgjidhje për personat e zhdukur gjatë luftës.
Ajo tha se për kryeministrin Kurti kjo është pika e parë si prioritet.
“Nëse jo tash unë nuk e di kur munden të bëjnë një plan se qysh duhet të bëhet një zgjidhje tjetër për të pagjeturit në Kosovë. Ky është momenti më i rëndësishëm dhe i duhuri për një zgjidhje. Besoj që për kryeministrin Kurti pika e parë do ta jetë kjo si prioritet”, u shpreh Balje.
Deputetja e grupit multietnik, Duda Balje, thotë se çështja e personave të pagjetur në Kosovë është shumë e rëndësishme, por nuk shpreson që shteti serb do të ndihmojë në këtë proces.
Sipas saj, Serbia asnjëherë nuk e ka shprehur vullnetin të ndihmojë Kosovën mbi këtë çështje.
“Niveli i bisedimeve është më aktiv, ne kemi shkuar edhe me Komisioni për të Drejtat e Njeriut tek shoqata që merret me çështjen e personave të zhdukur dhe mendoj që kjo është çështje shumë e rëndësishme. Nga ana e Serbisë nuk jam pozitive që do të ndryshohet diçka sepse ata asnjëherë nuk kanë shprehur vullnet për të biseduar me neve për këtë çështje”, theksoi Balje.
Në luftën e zhvilluar në Kosovë më 1998-99, janë vrarë mbi 13.000 civilë dhe mijëra të tjerë janë zhdukur, shkruan Front Online.
Mbi 1.600 persona vazhdojnë të jenë ende të pagjetur, pjesa më e madhe e tyre shqiptarë.
