Kreu i Aleancës për Ardhmërinë e Kosovës Ramush Haradinaj, ka kujtuar masakrën që u bë nga forcat serbe në Krushën e Madhe dhe Krushën e Vogël, përcjell InLajmi.
Haradinaj tha se Krusha e Madhe dhe Krusha e Vogël na kujtojnë në çdo fundmars se sa e madhe ishte sakrifica e këtij populli për lirinë e Kosovës
Tutje, ai tha se forcat serbe intensifikuan edhe më shumë gjenocidin, duke mos kursyer kështu as pleqët, grate dhe fëmijët.
Gjithashtu Haradinaj kujtoi edhe 49 martirët e familjes Berisha nga Suhareka, të cilët u ekzekutuan mizorisht 24 vjet më parë, e ku 19 prej tyre ishin fëmijë.
Postimi i plotë i tij:
Pas fillimit të fushatës së bombardimeve të NATO-s më 1999, forcat policore dhe ushtarake serbe kishin intensifikuar edhe më shumë krimet, gjenocidin dhe dëbimin e popullatës shqiptare nga Kosova, duke mos kursyer as pleqtë, gratë dhe fëmijët.
Krusha e Madhe dhe Krusha e Vogël na kujtojnë në çdo fundmars se sa e madhe ishte sakrifica e këtij populli për lirinë e Kosovës. Mbi 350 motra e vëllezër tanë të pafajshëm, mizorisht i ndanë nga ne, ata që nuk patën mëshirë për askënd, ata që tentuan zhbërjen e qenies shqiptare nga dheu.
Gjithashtu, sot kujtojmë 49 martirët e familjes Berisha nga Suhareka, të cilët u ekzekutuan mizorisht 24 vjet më parë, e ku 19 prej tyre ishin fëmijë.
Kujtimi i martirëve dhe sakrifica e tyre është dëshmi për t’i kultivuar më tej dhe mbrojtur vlerat për të cilat ata dhanë jetën.
I përjetshëm qoftë kujtimi për ta! /InLajmi/
