Suita Gorqi, 21-vjeçare, i kalon deri në 15 orë në ditë në TikTok.
Ajo është vetëm një prej miliona bashkëmoshatarëve të saj në botë që kalojnë kohë të konsiderueshme në këtë aplikacion me video të shkurtra.
Arsyet janë pa fund: për qejf, punë, për të sfiduar veten, e plot arsye tjera.
Mirëpo, Suitës – e cila ka mijëra ndjekës – qëndrimi në TikTok i është kthyer në punë. Ajo, përveç përmbajtjes në llogarinë e saj, menaxhon edhe llogaritë e disa kompanive në Kosovë.
Megjithatë, ajo ka thënë se po tenton që çdo herë e më shumë të limitojë kohën e përdorimit të këtij aplikacioni në kohën e lirë.
Në vitin 2021, TikTok-u është shpallur aplikacioni më i shkarkuar në botë.
Aplikacioni është në pronësi të kompanisë kineze, ByteDance.
Ndonëse TikTok-u përdoret nga të gjitha moshat, të rinjtë janë shënjestra kryesore, prandaj edhe po rriten shqetësimet për sigurinë e tyre çdo ditë e më shumë.
Në muajin mars, në Shqipëri janë parë disa të rinj duke ndjekur një trend të ngasjes së makinës në deri 300 kilometra në orë, ndonëse ditë më parë në këtë shtet kanë vdekur 3 të rinj në një aksident trafiku.
Policia ka thënë se shkak i aksidentit ka qenë shpejtësia përtej normales.
Trende të rrezikshme në TikTok ka pafund: ngufatja e vetes deri në alivanosje, përzierjet e ilaçeve, kërcimi nga katet më të larta të ndërtesave, dhe përplot tjera të ngjashme.
TikTok-u përditëson doracakun për përmbajtje teksa i rritet presioni nga Perëndimi
Sipas psikologëve, ky aplikacion shkakton varësi tek ata, për shkak të algoritmit që e personalizon shumë përmbajtjen.
Mjekja Nia Williams nga Universiteti i Bangorit, ka thënë për transmetuesin britanik, BBC se TikToku shkakton varësi, sepse liron dopaminë në tru dhe i bën njerëzit të ndihen mirë.
Mirëpo, shqetësimet për TikTok-un nuk mbarojnë këtu.
Ekzistojnë edhe shqetësimet për privatësinë.
Shumë vende, përfshirë Shtetet e Bashkuara dhe Kanadaja, e kanë ndaluar përdorimin e këtij aplikacioni në pajisjet qeveritare, për shkak të dilemave se TikTok-u mund të ndajë të dhënat e përdoruesve me Qeverinë kineze, shkruan REL.
Në anën tjetër, kompania që e menaxhon TikTok-un, i ka hedhur poshtë këto pretendime.
